Айсен Николаев: «Уопсай күүһүнэн кыстык от бэлэмнэниллиэ»

Быйыл Саха сиригэр былаан быһыытынан 459 тыһыынча туонна от бэлэмнэниллиэхтээх. Ылыныллыбыт былаан толоруллар кыахтаах диэн бүгүн, от ыйын 28 күнүгэр, Ил Дархан Айсен Николаев «Якутия, вперед!» биэриигэ эттэ.

«Бүгүҥҥү туругунан 88 тыһыынчаттан ордук туонна от бэлэмнэннэ. Быйыл үгүс улууска от үүнүүтэ куһаҕана суох. Үчүгэй көрдөрүүлээхтэринэн киин уонна илин эҥэр улуустара буолаллар. Бүлүү бөлөх улуустарыгар сайын саҕаланыаҕыттан ардахтар түһэннэр балаһыанньа арыый уустук. Билигин кураан кэмигэр манна сылы тахсар оту тэтимнээхтик бэлэмниир сорук турар. Оттуур ходуһалара ууга сытар үс улууска мобильнай биригээдэлэр тэриллэн номнуо үлэлии сылдьаллар», — диэтэ Айсен Николаев.

Ил Дархан бэлиэтээбитинэн, өрөспүүбүлүкэ өттүттэн бу хайысхаҕа былааннаах үлэ барар. От куһаҕаннык үүммүт улуустарыгар мобильнай биригээдэлэри тэрийэн үлэлэтэр сорук турар.

«Быйыл уопсай күүһүнэн кыстыкка киирэр оту сөптөөхтүк бэлэмниэхпит», — диэн Николаев эттэ.