Айсен Николаев Уус-Ньараҕа байыас дьиэ кэргэнин кытта көрүстэ

Ил Дархан Айсен Николаев Өймөкөөн оройуонугар оробуочай сырыытын чэрчитинэн, анал байыаннай дьайыы кыттыылааҕа Григорий Васильев дьиэ кэргэнин кытта көрүстэ.

Айсен Николаев Григорийга хорсун быһыытын иһин махтанна. Григорий Васильев 2024 сыллаахха байыаннай дьайыы зонатыгар ылбыт бааһырыытын кэннэ демобилизацияламмыт. Уустук тургутууну ааһан, атаҕын ампутациятын кэнниттэн реабилитацияны ааһар. Васильевтар дьиэ кэргэттэрэ бары төлөбүрдэри ылбыттар, өйөбүл миэрэлэринэн туһаммыттар.

«Ростов куоракка госпитальга киирбитим кэннэ, бары наадалаах көмөнү оҥорбуттара. Кэлин Санкт-Петербург куоракка көһөрбүттэрэ, онно эмиэ көмө оҥоһуллубута, куратордар реабилитация хас биирдии түһүмэҕин ааһарга көмө оҥорбуттара. Биһиэхэ Саха сиригэр курдук олус элбэх гуманитарнай уонна психологическай көмө ханна да оҥоһуллубат дии саныыбын», — диэн Григорий Васильев бэлиэтээтэ.

Васильевтар дьиэ кэргэттэрэ Ил Дархаҥҥа байыаннайдар уонна анал байыаннай дьайыы кыттыылаахтарыгар болҕомтотун уонна көмөтүн иһин махтаннылар, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.