Айсен Николаев Владимир Путин саҥа талыллыбыт эрэгийиэннэр баһылыктарын кытта көрсүһүүтүгэр кыттыыны ылла

Бүгүн, балаҕан ыйын 28 күнүгэр, Ил Дархан Айсен Николаев Дойду Бэрэсидьиэнэ Владимир Путин саҥа талыллыбыт эрэгийиэн баһылыктарын кытары видеоконференцсибээс нөҥүө көрсүһүүтүгэр кытынна.

Дойду Бэрэсидьиэнин кытары көрсүһүүгэ Арассыыйа 26 субъегыттан балаҕан ыйыгар саҥа талыллыбыт эрэгийиэн баһылыктара кытыннылар. Владимир Путин эрэгийиэн баһылыктарын быыбарга кыайбыттарынан эҕэрдэлээтэ. Кини ааспыт быыбардар дьоһуннаахтык уонна дьэҥкэтик барбыттарын бэлиэтээтэ.

Бэрэсидьиэн биһиги саҥа эрэгийиэннэрбитигэр – Донбаска уонна Новороссияҕа – быыбардар аан бастаан Арассыыйа сокуонунан барбыттарын бэлиэтээн эттэ. Дойду баһылыга чиэһинэйдик уонна аһаҕастык, улахан күрэстэһиилээхтик ааспыттарын уонна уопсастыба өйө-санаата уһуктан, өйдөөн, быыбарга кыттыыта улааппытын бэлиэтээтэ.

«Дьон быыбарга кыттан дойдуларын, эрэгийиэннэрин инникитин, ол аата оҕолорун уонна дьиэ кэргэннэрин кэскилин быһааралларын өйдөөтө. Ол иһин быыбарга кыттыы урукку кэмнэрдээҕэр улаатта. Эһиги быыбардааччыларгыт иннигэр улахан эппиэтинэһи сүгэҕит, ону бэркэ билэҕит уонна эрэгийиэннэргит олохтоохторун эрэллэрин толоруохтара, олохторун таһымын уонна хаачыстыбатын үрдэтиэхтэрэ диэн эрэнэбин», — диэтэ Владимир Путин.

Дойду баһылыга социальнай эйгэҕэ сыһыаннаах, байыаннай дьайыы кыттыылаахтарын, ол иһигэр бааһырыыны ылбыттар дьиэ кэргэттэрин  өйөөһүн биир сүрүн боппуруоһунан буоларын тоһоҕолоон бэлиэтээтэ. Биһиэхэ барыбытыгар бастатан туран, былаас уорганнарын бэрэстэбиитэллэригэр бары таһымнарыгар дьоруойдар тустарыгар уонна чугас дьоннорун сүтэрбиттэргэ кыһаллыы – Аҕа дойду көмүскээччилэригэр махталбыт уонна ытык иэспит буолар  диэн түмүктээн эттэ.

Владимир Путин саҥа талыллыбыт баһылыктарга  дьон күннээҕи олоҕун хаачыстыбата уонна экэнэмиичэскэй үүнүүтэ быһаччы тутулуктаах эрэгийиэннэрин инфраструктуратыгар: тырааныспар, инженернэй, коммунальнай, социальнай боппуруостарга улахан болҕомтолорун ууралларыгар эттэ.

Манна Саха сирин сыһыары тутан этэр буоллахха, биһиги өрөспүүбүлүкэбит кэлиҥҥи биэс  сылга биллэрдик иннин диэки кимиилээхтик хардыылаата. Ол курдук, ааспыт 2022 сылга эрэгийиэннээҕи баалабай бородуукта икки төгүл үрдээбитэ элбэҕи туоһулуур. Өрөспүүбүлүкэ бырамыысыланнай оҥорон таһаарыыга Уһук Илиҥҥи уокурукка 1-кы, оттон Арассыыйа үрдүнэн 6-с миэстэлэргэ тахсыбыта. Инвестиционнай бырайыактары олоххо киллэриигэ биир инникилэр кэккэлэригэр сылдьар. Креативнай индустрия уонна IT-салаа түргэнник сайынна. Саха сиригэр национальнай бырайыактары олоххо киллэриигэ федеральнай бүддьүөттэн үтүмэн үп-харчы көрүллүбүтэ. Ааспыт биэс сыл устатыгар улахан социальнай 274 эбийиэк тутуллан үлэҕэ киирэрэ ситиһилиннэ.

«Саха сирин олохтоохторун ааттарыттан өрөспүүбүлүкэбит сайдарыгар улахан өйөбүлүн иһин Владимир Владимировичка улахан махталбын тиэрдэбин», — диэн Ил Дархан Айсен Николаев көрсүһүү түмүгүнэн санаатын үллэһиннэ.