Хаартыскаҕа Андрей Сорокин түһэриитэ, СИА
Ил Дархан Айсен Николаев бүгүн, олунньу 27 күнүгэр, Аммаҕа Неустроевтары кытары көрүстэ. Бу дьиэ кэргэн «Всей семьёй» Арассыыйатааҕы куонкурус кыттыылаахтарынан буолаллар.
Иллээх ыал аҕа баһылыга Дмитрий Алексеевич «СӨ ОДьКХ» ГУП Амматааҕы филиалыгар машинист-хачыгаарынан үлэлиир. Кини — мас тардыһыыга Арассыыйа икки төгүллээх чөмпүйүөнэ, 2023 сыллаахха аан дойду чөмпүйүөнүнэн буолбута, аан дойду кубогын кыайыылааҕа. Кэргэнэ Сахайаана Тарасовна Аммаҕа нэһилиэнньэ социальнай көмүскэллээх буолуутун киинин салайааччытын солбуйааччытынан үлэлиир. Улууска эдэр ийэлэр сэбиэттэрин бэрэссэдээтэлэ, СӨ ыччат бэлиитикэтин туйгуна.
—Дьиэ кэргэн сылыгар маннык тэрээһиннэр ыытыллаллара олус үчүгэй! Бу күөн күрэстэн биһиги өссө сомоҕолостубут. Араас сорудах кэлэрин барытын көмөлөөн бииргэ толордубут, — диэн кэпсиир Сахайаана Неустроева.
Неустроевтар дьиэ кэргэн үс оҕолоохтор. Улахан кыыстара Карина 7-с кылааска, Амина 4-с кылааска үөрэнэллэр. Саамай кыралара Арылхан «Хатыҥчаана» уһуйааҥҥа сылдьар.
Айсен Николаев истиҥ көрсүһүүгэ дьиэ кэргэн инники былаанын ыйытта. Неустроевтарга бары үтүөнү баҕарда.
Бүтүн Арассыыйатааҕы «Всей семьей» бырайыак РФ Бэрэсидьиэнэ Владимир Путин биллэрбит Дьиэ кэргэн сылыгар — 2024 сыл саҥатыгар саҕаламмыта. Бырайыакка Арассыыйа эрэгийиэннэригэр олорор ыаллар кытталлар. Кыттарга всейсемьей.рф саайтка регистрацияланаллар. Биллэринэн, бу бырайыакка Саха сириттэн 1300-тэн тахса ыал кыттар.
Нэдиэлэҕэ биирдэ уустуга суох сорудах бэриллэр. Ону дьиэ кэргэнинэн толороллор. Музейга сылдьаллар, успуордунан дьарыктаналлар — саамай сүрүнэ, бары бииргэ уонна иллээхтик сылдьаллара буолар.
Саха сирэ улахан дьиэ кэргэттэрдээҕинэн аатырар, элбэх оҕолоох ыаллар ахсааннара сылтан сыл элбээн иһэр. Бэйэ-бэйэлэрин өйдөһөн, өйөһөн хас да көлүөнэ дьиэ кэргэн биир дьиэҕэ иллээхтик олороллор. Өрөспүүбүлүкэҕэ аҕам саастаах дьоҥҥо, аҕа көлүөнэҕэ ытыктабыллаахтык сыһыаннаһаллар, кинилэргэ кыһамньы ууруллар, оҕолору дьиэ кэргэни ытыктыырга, төрөөбүт дойдуну таптыырга үөрэтэллэр.
Сиһилии https://www.sakha.gov.ru/news/front/view/id/3389210 манна ааҕыҥ.
СӨ Ил Дарханын уонна бырабыыталыстыбатын пресс-сулууспата
Андрей Сорокин хаартыскаҕа түһэриитэ, СИА
Бу күннэргэ Саҥа дьыл сүпсүлгэнэ саҕаланаары турар буолан, ас ырыынактарыгар испииһэк тутуурдаах дьон үксээбит. Өрүс…
“Дьоруойдар кэмнэрэ” бырагыраамаҕа кыттар сайаапкалары почтанан ылыы саҕаланна. Бу -- бырагыраама иккис түһүмэҕэ. Сайаапкалары билигин…
LETO куорат эйгэтин тупсаҕай оҥоруу киинэ Сэбиэскэй Сойуус Дьоруойа Федор Попов пааматынньыгын эскииһин оҥорууга күрэс…
Бу сыл ахсынньы 11 күнүгэр Былатыан Ойуунускай аатынан судаарыстыбаннас түмэлигэр киэн туттар биир дойдулаахпыт, комсомольскай,…
Филиппиныттан уонна Таилантан ахсынньы 14 күнүгэр ыытыллар «Вызов Севера» күрэхтэһиигэ кыттар боксердар бүгүн Дьокуускайга саамай…
Саха сиригэр анал байыаннай дьайыы кыттыылаахтарыгар уонна кинилэр дьиэ кэргэттэригэр анаан "Е-Якутия" порталга «Забота» электроннай…