Айсен Николаев Ыччат күнүнэн эҕэрдэлиир

Ытыктабыллаах Саха сирин олохтоохторо! Күндү Сахабыт сирин ыччата!

Саха Өрөспүүбүлүкэтин салалтатын аатыттан уонна тус бэйэм ааппыттан эһигини Ыччат күнүнэн ис сүрэхпиттэн эҕэрдэлиибин!

Саха сирэ – ыччат өрөспүүбүлүкэтэ. 14-тэн 35-гэр диэри саастаах 315 тыһыынчаттан тахса саха сирин олохтооҕо – бу өрөспүүбүлүкэ нэһилиэнньэтин үс гыммыт биирэ, эрэгийиэн бигэ сайдыыта тутулуктаах тыыннаах уонна күүрээннээх кыаҕа буолар. Бу бырааһынньык – эһиги хас биирдиигитигэр баар ыччат эниэргийэтин, кэрэҕэ эрэлин уонна уостубат талаанын бэлиэтэ буолар.

Сыл аайы Саха сирин үрдүнэн 200 тыһыынчаттан тахса эдэр киһини түмэр 1 500-ттан тахса чаҕылхай тэрээһин ыытыллар. Олортон биир саамай суолталаахтара – үгэскэ кубулуйбут «МУУС УСТАР» ыччат бэстибээлэ. Бу бэстибээл Саха сирин ыччатын айар үлэҕэ, урбааҥҥа, успуорка, туризмҥа, архитектураҕа, байыаннай бэлэмнэниигэ уонна да атын интэриэһинэй хайысхаларга кыаҕын арыйарга уонна өйүүргэ ураты түһүлгэ буолла.

Быйыл V үбүлүөйдээх бэстибээл финала 5 тыһыынчаттан тахса кыттааччыны муста, оттон бары түһүлгэлэр уопсай хабыылара 25 тыһыынча киһиэхэ тиийдэ. «Ыччат бастыҥ улууһа» уонна «Арктика бастыҥ ыччат улууһа» үрдүк ааттары Мэҥэ Хаҥалас улууһа уонна Өлөөн  оройуона сиэрдээхтик ыллылар.

Кэбээйи улууһугар ыытыллыбыт «ТАБЫС» бэстибээл 2024 сыллаахха 2500 кыттааччыны түмэн, ыччат тэрээһиннэрин каартатыгар чаҕылхайдык бэлиэтэннэ. Быйыл биһиги Саха сиригэр ыччат көҕүлээһиннэрин сайыннарар саҥа түһүлгэни – «Патриот» ыччат киинин тэрийдибит. Бу киин дьиҥнээх патриоттары иитэн таһаарар, ыччат сыаннастарын тиһигин олохтуур, гражданскай көхтөөх буолууну уонна кыттыгастаах быһыыны-майгыны үөскэтэр, ону тэҥэ үтүө дьулууру уонна волонтерствоны уопсастыба култууратын арахсыспат  сыалтан Бүтүн Арассыыйатааҕы хамсааһыннар эрэгийиэннээҕи филиалларын, байыаннай-спортивнай бэлэмнээһин уонна патриотическай иитии кииннэрин үлэлэрин түмүөҕэ.

Саха сирэ – ыччат кэскил туһунан ыраламмат, ону бэйэтэ көхтөөхтүк уонна эппиэтинэстээхтик тутар эрэгийиэнэ. Ол курдук, өрөспүүбүлүкэ дьиҥнээх күүһүнэн устудьуоннар этэрээттэрэ буолаллар. Быйыл сүрүн салааларга: тутууга, педагогикаҕа, мэдиссиинэҕэ, тыа хаһаайыстыбатыгар 4,5 тыһыынча байыаһы үлэнэн хааччыйар былааннаахпыт. Дойду Бэрэсидьиэнэ Владимир Путин көҕүлээбит «Ыччат уонна оҕо аймах» национальнай бырайыак чэрчитинэн Росмолодежь өйөбүлүнэн тэриллэр «Биһиги туспутугар!»  ыччат десана өрөспүүбүлүкэ нэһилиэнньэлээх пууннарыгар сэрии уонна тыыл бэтэрээннэригэр, анал байыаннай дьайыы кыттыылаахтарын дьиэ кэргэттэригэр, соҕотох олорор дьоҥҥо көмөлөһөллөр. Быйыл аахсыйаларГорнай, Бүлүү, Үөһээ Бүлүү уонна Ньурба улуустарыгар ыытылыннылар, сотору кэминэн Хаҥалас, Томпо, Сунтаар оройуоннарыгар ыытыллыахтара.

Ыччат – биһиги өрөспүүбүлүкэбит уонна дойдубут кэскилэ, онон биһиги Сахабыт сирэ уонна Улуу Арассыыйабыт сарсыҥҥыта эһигиттэн тутулуктаах. Эһиги сыалгытын-соруккутун ситиһэр дьулуургут, дьоҕургут уонна төрөөбүт дойдугутугар бэриниилээх буоларгыт саамай үрдүк ситиһиилэргэ тиэрдиэ диэн эрэнэбин. Хас биирдии күн эһиэхэ бэйэҕит кыаххытын арыйарга саҥа саҕахтары арыйдын, интэриэһинэй көрсүһүүлэри, үтүө өйдөбүллэри бэлэхтээтин.

Бэйэҕитигэр итэҕэйиҥ, ыра санаа оҥостору, сыалгыт диэки дабайары куттанымаҥ! Олоххут үөрүнэн, тапталынан уонна тулалыыр дьон ытыктабылынан туоллун. Бырааһынньыгынан, күндү доҕоттор!

Дьоллоох буолуҥ, бэйэҕит күүскүтүгэр эрэллээх буолуҥ. Үгэстэри чиэстээхтик салҕааччы, уларыйыыны-тэлэрийиини киллэрээччи буолуҥ, Сахабыт сирин күүстээх уонна чэчирии сайдар кэскилин түстээҥ!

Саха Өрөспүүбүлүкэтин Ил Дархана А.С. Николаев