Айсен Николаев Үөһээ Бүлүү улууһун олохтоохторун ыһыаҕынан эҕэрдэлээтэ

Ил Дархан  Айсен Николаев бэҕэһээ, бэс ыйын 24 күнүгэр, Үөһээ Бүлүү улууһугар оробуочай сырыытын чэрчитинэн Арассыыйаҕа Дьиэ кэргэн уонна улууска Түмсүү сылыгар анаммыт ыһыахха кытынна.

«Аҕыйах хонуктааҕыта дойду Бэрэсидьиэнэ Владимир Владимирович Путин Дьокуускайга кэлэ сылдьан Саха сирин сайдыытын былааннарын кытта билсэн, өйөөтө уонна алҕаата. Судаарыстыба баһылыга Саха сиригэр элбэх национальностаах норуотун култууратын тыыннаах хаалларыыга көдьүүстээх үлэ ыытылларын иһин махтанна уонна нэһилиэстибэни салгыы хаҥатарга баҕа санаатын тиэртэ. Бу кини тылын эһиэхэ тиэрдэбин. Билигин Саха сирин бары куораттара, ол иһигэр Үөһээ Бүлүү улууһа эмиэ күүскэ сайдаллар. Айымньылаах үлэҕитигэр ситиһиилэри баҕарабын. Эһиги түмсүүгүт өссө улахан атын ситиһиини дабайарга кыах биэриэ диэн эрэнэбин», — диэтэ Айсен Николаев.

Ил Дархан бу сырдык бырааһынньыкка этиллибит алгыс тыллара төрөөбүт дойдуларын көмүскүүр байыастарга тиийэригэр, сотору кэминэн Кыайыылаах дьиэлэригэр төннөллөрүгэр баҕарда. Ол кэннэ Ил Дархан Айсен Николаев ыһыах үөүүлээх аһыллыытын сиэрин-туомун кэмигэр улуус олохтоохторугар судаарыстыбаннай наҕараадаларын туттарда.

«Саха Өрөспүүбүлүкэтин норуотун хаһаайыстыбатын үтүөлээх үлэһитэ» үрдүк аат Нам нэһилиэгин баһылыга Александр Кардашевскайга иҥэрилиннэ. «Гражданскай килбиэн» бэлиэнэн Мелиорацияҕа уонна тыа хаһаайыстыбатын уунан хааччыйыыга управлениетын Үөһээ Бүлүүтээҕи филиалын экскаватор-машиниһа Капитон Егоров наҕараадаланна. Ил Дархан илиититтэн «Саха Өрөспүүбүлүкэти муниципальнай сулууспатын туйгуна» бочуоттаах бэлиэни Кэнтик нэһилиэгин кылаабынай специалиһа Павел Павлов тутта. Ону сэргэ Ил Дархан М.А. Алексеев аатынан Үөһээ Бүлүүтээҕи лиссиэй-интэринээт выпускнига Сергей Игнатьевка кыһыл көмүс мэтээли туттарда.

Улуус баһылыга Валерий Николаев Арассыыйаҕа Дьиэ кэргэн уонна Саха сиригэр Оҕо саас сылыгар оҕо балыыһатын бастакы  сыбаайатын түһэрии уонна эбийиэк тутуута саҕаламмыта ураты түгэн буоларын эттэ. Үөрүүлээх бырааһынньык оһуохайынан түмүктэннэ.