Айсен Николаев: «Үөрэх эйгэтигэр оптимизация үөрэххэ охсуута суох ыытыллыахтаах»

Айсен Николаев үөрэх эйгэтигэр оптимизация үөрэххэ охсуута суох ыытыллыахтаах диэтэ. Бу туһунан Саха сирин Ил Дархана Айсен Николаев өрөспүүбүлүкэ үөрэҕин уонна наукатын үлэһиттэрин тохсунньутааҕы мунньаҕар иһитиннэрдэ. Бу туһунан sakha.gov.ru суруйар.

Эрэгийиэн баһылыга бэлиэтииринэн, ыытыллар уларытыылар уопсай сыаллара – үөрэх өҥөтүн хаачыстыбатын үрдэтии. Онон структураҕа оптимизация уонна ыстаат араспысаанньатын сааһылааһын үөрэтиини тэрийиигэ хоромньута суох барыахтаах. “Уларыйыылар уопсай сыаллара —  үөрэх хаачыстыбатын үрдэтии. Ол иһин структураҕа сарбыйыы уонна ыстааты сааһылааһын үөрэх хаамыытыгар дьайыа суохтаахтар”, — диэтэ Айсен Николаев.

Кини төрөөбүт тыллары үөрэтии кээмэйин уонна чаастарын оннунан хаалларарга болҕомтону туһаайда. Өрөспүүбүлүкэ Ил Дархана бу боппуруос үөрэҕи салайыы бары таһымыгар тутуһуллуохтааҕын ыйда. Уонна үөрэх уонна наука министиэристибэтигэр, ону тэҥэ үөрэх муниципальнай тэриллиилэригэр сорудахтаата.

Айсен Николаев оскуолалары уонна оҕо уһуйааннарын сабыы туһунан буолбакка, сарбыйыы (оптимизация) үөрэтиини уонна иитиини кытта быһаччы сибээһэ суох дуоһунастары уонна ыстаапкаларга сыһыаннаах, чуолаан, административнай-салайар персоналга. Маныаха Үөрэх уонна наука министиэристибэтэ уопсай үөрэхтээһин ситимин табыгастаахтык тэрийии араас барылларын сүбэлиир.

Ыытыллыан сөптөөх быһаарыылар истэригэр уһуйааннар уонна оскуолалар юридическай сирэйдэрин холбооһун. Ону тэҥэ куораттарга, бөдөҥ нэһилиэнньэлээх пууннарга уонна оройуоннар кииннэригэр сирдээҕи-уоттааҕы үөрэх комплекстарын тэрийии буолуон сөп. Саха сирин баһылыга кэнники сылларга үбү-харчыны туһаныыга уонна ыстаат араспысаанныйатын көдьүүстээхтик туһаныыга тиһиктээхтик үлэлээбит муниципальнай оройуоннарга бүгүн тэрээһин боппуруостарга  ыгым балаһыанньа үөскээбэтин бэлиэтээтэ.

Кини холобур быһыытынан Таатта, Аллайыаха, Бүлүү, Алдан уонна Ленскэй оройуоннарын ааттааталаата. Бары муниципальнай тэриллиилэр баһылыктарыгар үөрэх тэрилтэлэрин тиһигин көрүүгэ-истиигэ биир кэлим сыһыан баар буоларын уонна өрөспүүбүлүкэ бырабыыталыстыбатын кытта 2026 сылга олоххо киллэриллэр болдьохтоох структураны уонна ыстаат единицатын бэрээдэктээһин былааныгар илии баттаһарга сорудахтаата.

Айсен Николаев этэринэн, бу миэрэлэри олоххо киллэрии өрөспүүбүлүкэ бары муниципальнай тэриллиилэригэр оҕолорго үөрэтии хаачыстыбатын уонна үөрэх өҥөлөрүнэн туһаныыларын хаачыстыбатын тутуһууга үөрэх ситимин тэҥник сайыннарыыны хааччыйыахтаах.

Үөрэх уонна наука миниистирэ Нюргуна Соколова өрөспүүбүлүкэҕэ үөрэх тиһигин структуратын ыстаатын саҥардыы учууталлары сарбыйыыта суох уонна педагогическай састаабы оннунан хаалларан ыытыллар диэн этэн турар. Сиһилии: https://www.sakha.gov.ru/news/18888