Сүрүн

Айсен Николаев Юрий Трутнев тохсунньутааҕы сүбэ мунньаҕар кытынна

Ааптар: Саха Сирэ

18.01.2025, 08:51

Хаартыска: SakhaGov

Бөлөххө киир:

Москваҕа РФ Бырабыыталыстыбатын бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Уһук Илин уокурук 2024 сыллааҕы социальнай-экэнэмиичэскэй сайдыытын уонна 2025 сыллааҕы сүрүн соруктарын быһаарыыга көһө сылдьар мунньаҕы тэрийэн ыытта. Тохсунньутааҕы сүбэ мунньахха Ил Дархан Айсен Николаев кыттыыны ылла.

«Биһиги үгэс курдук эрэгийиэннэр баһылыктарын, Уһук Илин уонна Арктика сайдыытын министиэристибэтин салалтатын, сайдыы үнүстүтүттэрин салалтатын кытта ыытар үлэбит туһунан сүбэлэһэбит. Бу эппиэтинэстээх үлэҕэ Уһук Илиҥҥэ уонна Арктикаҕа 10,5 мөл. гражданнар олохторун хаачыстыбатын тупсарар соруктар баалларын туһунан хаһан да умнубаккытыгар көрдөһөбүн. Биһиги билигин олорор кэммитигэр үчүгэйдик эрэ буолбакка, олус үчүгэйдик үлэлиэхтээхпит», — диэн Юрий Трутнев сүбэ мунньаҕы арыйда.

Уһук Илин уокурук уонна Арктика сайдыытыгар миниистирин бастакы солбуйааччы Гаджимагомед Гусейнов олорор дьиэ тутуутун сайыннарыытын туһунан иһитиннэрдэ. 2024 сылга уокурук үрдүнэн 4,7 мөл. кв. м иэннээх олорор дьиэ үлэҕэ киирбит. Дьиэ сыаната Арассыыйа үрдүнэн аан бастакытын 12%-нан намтаабыт. Дьиэни-уоту тутуу уонна сыанатын чэпчэтии Бэрэсидьиэн көҕүлээбит «Уһук Илиҥҥи ипотека», «Уһук Илиҥҥи кыбаартал» уонна «Уһук Илиҥҥи аренда» бырагыраамаларынан ситиһиллибит.

«Уһук Илиҥҥи кыбаартал» бырагырааманан Уһук Илин сэттэ эрэгийиэнигэр куонкурус ыытыллыбыт уонна аҕыс былаһааккаттан сэттэҕэ тутааччылар быһаарылыннылар. Былаһаакка уопсайа олорор дьиэтэ 2,3 мөл. кв. м иэннээх, ол аата 83 тыһ. Уһук Илин олохтоохторун олорор дьиэнэн хааччыйыаҕа. Тутуу сэттэ былаһааккаттан түөрт былаһааккатыгар саҕаламмыт. «Доступное арендное жилье» бырагырааманан 12 тыһ. кыбартыыра атыылаһыллыбыт, онно 282 ыал олорор дьиэлэммит. Бу үксүгэр эдэр исписэлиистэр уонна байыаннай дьайыы кыттыылаахтара буолаллар.

Уһук Илин социальнай-экэнэмиичэскэй сайдыытын биир сүрүн көрдөрүүтүнэн Уһук Илин олоҕун хаачыстыбатын тупсарыыта буолар. Эрэгийиэннэр социальнай-экэнэмиичэскэй сайдыыларыгар федеральнай уонна эрэгийиэннээҕи инвестициялары улаатыннарыы анал мэхэньииһимнэрин уонна инструменнарын туһаныы көрдөрүүлэри тупсарар. Уһук Илин 25 куораттарын маастар-былааннарын олоххо киллэрии саҕаланна. 2030 сылга диэри Уһук Илиҥҥэ куораттары тупсарыы куонкуруһу ыытыы салгыы уһатыллан биэрдэ. Сиһилии манна аах.

Айсен Николаев Юрий Трутнев тохсунньутааҕы сүбэ мунньаҕар кытынна

Сообщить об опечатке

Текст, который будет отправлен нашим редакторам: