Айсен Николаев: «Саха сиригэр гроссмейстеры үүннэриэхпит»

Олунньу 1 күнүгэр Дьокуускайга Национальнай ойуулуур-дьүһүннүүр мусуойга Саха сирин баһылыга Айсен Николаев саахымакка Арассыыйа Куубагын бастакы түһүмэҕин түмүктээтэ, кыайыылаахтарга уонна кыттааччыларга наҕараадалары туттарда.

Арассыыйа саахымакка Куубагын бастакы түһүмэҕин – Саха сирин баһылыгын Куубагын  кыайыылааҕынан норуоттар икки ардыларынааҕы гроссмейстер, 2022 сылга Арассыыйа Куубагын хаһаайына Борис Грачев (Москва) буолла.

Володар Мурзин (Москва уобалаһа) — иккискэ, үһүскэ—гроссмейстер Михаил Кобалия (Москва) таҕыстылар. Турнирга уопсайа аҕыс эрэгийиэнтэн 50 киһи кытынна.

“Арассыыйа саахымакка Куубагын бастакы түһүмэҕэ аан бастаан ыытыллыыта дьиҥнээх устуоруйаҕа киирэр түгэн. Норуоттар икки ардыларынааҕы 5 гроссмейстер уонна ФИДЕ 6 маастара кыттыылара турнир үрдүк таһымнааҕын туоһулуур. Бүгүн ылыныллар хардыыларбыт бу оонньууну сайыннарыаҕа диэн эрэнэбин. Сотору кэминэн бэйэбитигэр гроссмейстер үүнүөҕэ”, — диэтэ Айсен Николаев.

Саха сирин баһылыга Куубак киэҥ ис хоһооннооҕун бэлиэтээтэ. Ол курдук, маастар-кылаастар, блиц-турнирдар ыытыллыбыттар, ол иһигэр аһаҕас халлаан анныгар блиц-оонньуу, тэҥинэн оонньооһун сеанса, эдэр уонна уопуттаах саахыматчыттар партиялара, судьуйаларга сэминээр буоллулар.

52 кыраадыс тымныыга таһырдьа Дмитрий Кобалия уонна Володар Мурзин блиц-оонньуулара ураты түгэнинэн буолла.

“Арассыыйа Саахымакка федерациятыгар Саахымакка Арассыыйа Куубагын тохсунньу ыйга Дьокуускайга ыытарга этии киллэриэхпит”, — диэтэ эрэгийиэн баһылыга.

Бириистээх миэстэлэри (4-тэн 12-кэ диэри) ылбыт Антон Шомоев (Бурятия),  ФИДЕ маастара Олег Рычков (Хабаровскай кыраай), ФИДЕ маастара Дмитрий Егоров (Саха сирэ), Денис Назаров (Саха сирэ), Нариман Мустафин (Саха сирэ), гроссмейстер Дмитрий Кряквин (Крым), Арсений Чумаевскай (Саха сирэ), Александр Иванов (Москва), Альберт Постников (Саха сирэ) наҕараадаланнылар.

Дьокуускайга Оҕо айымньытын дьиэтин Анатолий Карпов саамымакка оскуолатыгар уонна Үөһээ Бүлүү улууһун саахымакка федерациятыгар саахымат инвентарын атыылаһарга харчынан сэртипикээттэри туттардылар.

Дьокуускайтан Василий Романов көрөөччүлэр биһирэбиллэрин ылла.

“За самую красивую партию” номинацияҕа анал бирииһи Олег Рычковка туттардылар.

“Турнирга интэриэһинэй партиялар элбэхтэр этэ. Саамай кыраһыабай, сэргэх, көрөөччүлэр болҕомтолорун тардыбыт – бу Романов-Рычков партията буолар”, — диэтэ Саахымакка Арассыыйа федерациятын ситэриилээх дириэктэрин солбуйааччы Владимир Барскай.

Саха сирин Ил Дарханын Махтал суругун Куубакка партнер буолбут хампаанньалар туттулар:  “РНГ”АУо, “Саха сирин тимир суоллара” АУо, “Иркутскайдааҕы ньиэп хампаанньата” ХЭТ, “Высочайший” ПАУо, “АЛРОСА” (ПАО), СӨ Ойуулуур-дьүһүннүүр мусуойа.

Күрэхтэһии кылаабынай судьуйата – ФИДЕ норуоттар икки ардыларынааҕы арбитра, Арассыыйа бочуоттаах спортивнай судьуйата Михаил Крюков.

Тэрийээччилэр – СӨ Бырабыыталыстыбата, РФ успуорка министиэристибэтэ, РФ физическэй култуураҕа уонна успуорка министиэристибэтэ, Арассыыйа Саахымакка федерацията, СӨ Саахымакка федерацията, СӨ Үүнэр көлүөнэлэргэ тус сыаллаах пуондата, СӨ Национальнай ойуулуур-дьүһүннүүр мусуойа уонна СӨ Наука аччыгый академията.

Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын пресс-сулууспата.