Айсен Николаев суруналыыстар ыйытыыларыгар хоруйдаата

Айсен Николаев суруналыыстар ыйытыыларыгар хоруйдаата

25.12.2022, 16:14
Бөлөххө киир:

Бүгүн, ахсынньы 25 күнүгэр Ил Дархан Айсен Николаев Нам улууһун Нам сэлиэнньэтигэр саҥа аһыллыбыт Култуура уонна духуобунас киинин саалатыгар суруналыыстарга пресс-кэмпириэнсийэ ыытта. Суруналыыстар кэмпириэнсийэ буолуон иннинэ бу саҥа тутуллубут Култуура уонна духуобунас уораҕайыгар экскурсияҕа сылдьан көрдүлэр-иһиттилэр.

Өрөспүүбүлүкэ баһылыга суруналыыстар анал байыаннай дьайыылар, аан дойдуну аймаабыт дьаҥ утары охсуһар миэрэлэр, оскуолалары уонна уһуйааннары тутуу, ыччаты патриотическай иитии, табыгастаах куорат эйгэтин уонна сири-уоту тупсарыы, хамнас үрдээһинин, Арассыыйа Федерациятын мунньаҕын, бырамыысыланнас сайдыытын туһунан ыйытыыларыгар хоруйдаата.
Айсен Николаев өрөспүүбүлүкэҕэ оскуолалары уонна уһуйааннары тутуу биир сүрүн боппуруоһунан буоларын бэлиэтээтэ. Урут сылга уон оскуоланы киллэрии диэн сорук турар буоллаҕына, кэлин сылларга 20-лии оскуола уонна уһуйаан тутуллар буолбутун бэлиэтээтэ.

Байыаннай дьайыылар кыттыылаахтарыгар көмө туһунан ыйытыыны элбэхтик биэрдилэр. Бүгүҥҥү күҥҥэ бу өрөспүүбүлүкэ олохтоохторун долгутар саамай сүрүн боппуруос диэтэ Ил Дархан. Эрэгийиэннээҕи дьаһаллар ылылланнар анал байыаннай дьайыыларга кытта сылдьар дьоммутугар уонна кинилэр дьиэ кэргэттэригэр көмө оҥоһулларын, Саха сирин олохтоохторо көмөҕө көхтөөхтүк кытталларын итиэннэ байыаннай чаастарга тиэхиньикэнэн, араас атын сириэстибэлэринэн тиһиктээх көмө оҥоһулларын эттэ. Дьаҥ тарҕаныытын боппуруоһа билигин да сытыытык турарын бэлиэтээтэ. Ыарыы намырыырыгар миэдиктэрбит дьоһуннаах үлэлэрин ааттаата уонна үлэ тохтообокко салгыы барарын, дьон олоҕо үрдүктүк сыаналанарын бэлиэтээтэ.
Айсен Николаев быһыы-майгы билигин да уустугун эттэ. Саха сиригэр бу ыарыыттан өлүү дойду үрдүнэн 80 миэстэҕэ турарын, ол аата үлэ сөпкө барарын көрдөрөрүн иһитиннэрдэ. Ол эрээри, быһыыны биэрии таһыма 55% тэҥнэһэр оройуоннара бааллар.
Маны таһынан, Ил Дархан анал этиитигэр Саха сирэ Арассыыйаҕа бырамыысыланнаһын оҥорон таһаарыыта рекорднай таһымҥа тиийэн биир бастыҥнар истэригэр киирбитин кэпсээтэ. Хоту улуустарга интэриниэт киириитин боппуруоһа эмиэ турда. Кэккэ сылларга өрөспүүбүлүкэ суолу-ииһэ мөлтөх, ыраах сытар нэһилиэнньэлээх пууннарыгар хаачыстыбалаах интэриниэтинэн хабар сорук турарын эттэ Ил Дархан. Арктика сирин-уотун балысханнык сайыннарыы бырагырааматынан тиһиктээх үлэ салҕанар.
Пресс-конференция икки чаас барда, олус элбэх ыйытыы киирдэ.

Түмүккэ суруналыыстар Айсен Сергеевичка сиһилии кэпсээнин, ыйытыыларга толору хоруйдарын иһин махтаннылар. Итиэннэ САССР 100 сыллаах үбүлүөйүгэр, М.К.Аммосов төрөөбүтэ 125 сылын түмүктүүр тэрээһин өрө көтөҕүллүүлээхтик барбытын, ол чэрчитинэн сылы түмүктүүр пресс-кэмпириэнсийэ бу саҥа Култуура уонна духуобунас киинигэр ыытыллыбыта ураты суолталааҕын бэлиэтээтилэр.

Лента
Салгыы
29 января
  • -49°C
  • Ощущается: -49°Влажность: 62% Скорость ветра: 0 м/с

Сообщить об опечатке

Текст, который будет отправлен нашим редакторам: