Хаартыска: Андрей Сорокин
Бүгүн, от ыйын 12 күнүгэр Ил Дархан Айсен Николаев биир кэлим эксээмэҥҥэ сүүс баалы ылбыт үөрэнээччилэри уонна кинилэр төрөппүттэрин эҕэрдэлээтэ. Айсен Николаев хас эксээмэн аайы 100-түү баалы ылбыт оҕолорго 100-түү тыһыынчалаах сэртипикээти уонна Махтал суруктары туттарда.
Итини таһынан өрөспүүбүлүкэ баһылыга саамай үрдүк баалга үөрэнээччилэри бэлэмнээбит учууталларга 100 тыһыынча кэриҥнээх бириэмийэни олохтуурга уонна ону куорат уокуруктарын уонна муниципальнай оройуоннар салалталарыгар балаҕан ыйын 1 күнүгэр – Билии күнүгэр туттаралларыгар соруйда.
— Мин биир кэлим эксээмэн түмүктэрин мэлдьи кэтээн көрөбүн уонна өрөспүүбүлүкэҕэ сүүс баалы ылбыт үөрэнээччи баар буоллаҕына киэн туттабын. Оскуолаҕа үөрэммитиҥ устатыгар саамай үрдүк баалы ылар диэн хайдах сыранан кэлэрин бэйэм билэбин. Мин үөрэнэр кэммэр биир кэлим эксээмэн диэн суох этэ, ол эрээри оскуоланы түмүктүүр эксээмэн сыанатын долгуйа күүтэрбитин олус үчүгэйдик өйдүүбүн. Оҕолору олохторугар бастакы улахан кыайыыларынан эҕэрдэлиибин! Эһиги учууталларгытын уонна төрөппүттэргитин маннык улахан ситиһиигэ сирдээбиттэрин иһин эҕэрдэлиибин! – диэн эттэ Айсен Николаев.
Ил Дархан быйыл 24 выпускник биэс биридимиэккэ 27 саамай үрдүк көрдөрүүнү ыланнар ааспыт сыллааҕар тупсарбыттарын бэлиэтээтэ. Кинилэртэн Айтал Захаров, Мария Савкина, Илья Манохин иккилиитэ үрдүк көрдөрүүнү ситистилэр. Оттон нуучча тылыгар 12 оҕо сүүс баалы ыллылар. Онон сыл аайы көрдөрүү тупсан иһэрэ бэлиэтэнэр.
Икки биридимиэккэ – профильнай математикаҕа уонна информатикаҕа 100-түү баалы ылбыт В.П. Ларионов аатынан физико-тэхиньиичэскэй лиссиэй выпускнига Айтал Захаров үөрүүтүн үллэһиннэ:
— Мин икки биридимиэккэ үрдүк баалы ситиспиппиттэн долгуйа үөрбүтүм. Оттон бүгүн Бырабыыталыстыба дьиэтигэр Ил Дархан биһигини эҕэрдэлээн, сэртипикээт туттарбытыгар өссө долгуйдум. Бүгүҥҥү тэрээһин олус истиҥник, аһаҕастык ааста. Бүгүн Ил Дархан Айсен Николаев биһиэхэ, саамай үрдүк бааллаахтарга сэртипикээт туттарда, бу бириэмийэ олус улахан суумалаах дии саныыбын, өссө даҕаны итэҕэйэ иликпин. Маннык үрдүк ситиһиини ылары ситиспиппинэн, бастатан туран, ийэбэр, Любовь Леонидовна Поповаҕа, учууталларбар – Любовь Сергеевна Герасимоваҕа уонна Никифор Николаевич Куличкиҥҥа махтанабын.
Мин Санкт-Петербурга ИТМО университетыгар, Москватааҕы физико-тэхиньиичэскэй институкка уонна Уһук Илин федеральнай университетыгар үөрэххэ киирэргэ докумуоммун туттардым. Мин бу ситиһиим сыранан кэллэ, хас күн аайы оскуолаҕа үөрэнэрим тухары бу биридимиэттэргэ уруоктарга даҕаны, эбии бэйэм интэриниэтинэн даҕаны бэлэмнэммитим. Кэлэр өттүгэр биир кэлим эксээмэни туттарар оҕолорго сүбэлиэм этэ, ньиэрбинэйдээбэккэҕит, ыксаабаккаҕыт, ыгылыйбаккаҕыт дьарыктаныҥ. Аһара долгуйуу, куттанар санаа киһи уйулҕатын, санаатын ыһар, олоххо куһаҕаннык дьайар.
Тохсунньу 9 күнүгэр Уус Алдан улууһугар Мүрүгэ "Түһүлгэ" киин балаҕан-дьиэтигэр Саха Өрөспүүбүлүкэтин Суруйааччыларын сойууһун чилиэнэ,…
Доруобай буолуу төрдө. Тыыныынан эмтэнии биир саамай былыргы ньымата -- хатха-йога. Биһиги кэммитигэр биир сиргэ…
Күн-дьыл билгэтин төһө билэҕитий? Бу туһунан И.М.Сосин "Күн-дьыл билгэтэ" кинигэтигэр сиһилии суруллар. Тымныы кыһын буоларыгар:…
Дьааҥы улууһун Арыылаах орто оскуолатын саха тылын, литэрэтиирэтин учуутала, РФ уопсай үөрэхтээһинин туйгуна Петр Слепцов…
Ахсынньыга Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааспыта. Төрүт сахалыы эйгэни…
Сахалар билгэлэрэ Сахалар итэҕэллэринэн киэһэ таһырдьа улаханнык саҥарыа, айдаарыа суохтааххын, сир иччитин кыыһырдыаххын сөп. Түүн…