Айталаана: «Саргылан саха боотура»

“Саха сирэ” хаһыат (sakha-sire.ru) хорсун-хоодуот буойуттарбытыгар анаан, дойдуга бэриниилээх буолууга иитэр соруктаах хоһоон куонкуруһун биллэрбитэ.

Куонкуруспут 67-с кыттааччыта Бүлүү улууһун 2 Күүлэт нэһилиэгиттэн Николаева Айталина Гаврильевна-Айталаана:

Саргылан саха боотура

Бу суоһар үргүбүт олоххо,
Тустаахха ыарахан күннэргэ,
Бааллар ээ, өбүгэ ситимин
Салҕааччы эрдьигэн эрэттэр.
Сэриинэн иирбит Зеленскэй
үөдэнтэн күөрэйбит Гитлер,
Оҕону, дьахтары сэриилиир,
Дойдутун дьоннорун өлөртүүр.
Кыраны, кыамматы аһыммат,
Хаанынан ытатар, ырдьаҥныыр,
Бүтэһик тыыныгар үнүөхтүүр,
Өрүтэ өгдөҥнүүр, син эстэр…
Хаанымсах хара суор хаһыытын
Эйэбит холууба хаххалыыр,
Хараҥа былыты үтэйэн,
Быыһынан чаҕыл күн сандаарар.
Бу көҥүл олоҕу көмүскүү,
Көтөллөр хотойдор-өрүөллэр,
Дойдубут чөл тыынын харыстыы,
Бараллар эдэркээн ыччаттар.
Ийэ чуор чопчутун иэйиитэ,
Сүрэҕин тапталын сорҕото,
Сэриигэ анаммат уолана
Кэннинэн кэхтимэ, уолчааммыт!
Саханы ааттатыах ыччаппыт
Киэҥ дойду киэлитин харыстыыр,
Сир-дойду имэрийэ ынчыктыыр,
Эдэркээн сүрэҕи хаххалыыр.
Кыайыаххыт уолаттар-өрүөллэр!
Кытаанах санааны ылыныҥ!
Кыыллыйбыт фашиһы кыдыйан,
Күн көрүн дойдуга аҕалыҥ!
Биһиги ыраахтан алҕааммыт,
Эһиэхэ санаабыт илдьитин
Тапталбыт тылларын ыытаммыт,
Күүс-хахха буоллахпыт буолуохтун.
Салгыны хайыта тыыраммыт,
Атаарар дьоммутун хайҕааммыт,
Эһиэхэ кыайыыны баҕаран
Кытаанах санаанан ааттыыбыт!
Төннөөрүҥ, уолаттар, кыайыылаах,
Күүтэбит, долгуйа-кэтэһэ,
Аргыыйдык тыыннаахха эрэнэ,
Сэмээрдик сэмэйдик сипсийэ…