Айталина Бускарова: «Көмө уонна болҕомто уҕараабат»

Ньурба улууһун Ньурба куоратын бэрэстэбиитэллээх уорганын Сэбиэтин дьокутаата Айталина Бускарова «Элбэх доҕотторбут, биир дойдулаахтарбыт быстах ыҥырыыга хабыллан, сорохтор баҕа өттүнэн дойдуларын көмүскүү диэн байыаннай эпэрээссийэҕэ кытта барбыттара. Ньурбаҕа кинилэргэ уонна дьиэ кэргэттэригэр көмө, болҕомто уҕараабат», диэн саайт ааҕааччыларыгар санаатын үллэһиннэ.

— Билигин ыытылла турар байыаннай эпэрээссийэ Ньурба улууһун тумнан ааспата. Элбэх доҕотторбут, биир дойдулаахтарбыт быстах ыҥырыыга хабыллан, сорохтор баҕа өттүнэн дойдуларын көмүскүү диэн байыаннай эпэрээссийэҕэ кытта барбыттара.
Биһиги бу дьоммутугар күүс-көмө буолаары, санааларын көтөҕөөрү биир дойдулаахтарбыт, үксэ дьахтар аймах, санаабытын уураммыт, сүрэхпит сылааһын, илиибит сатабылын ууран туран, матырыйаалынай көмө оҥороору иис сыаҕа аһыллыбытыгар сылаас таҥас тигэммит хас даҕаны улахан баһыылканы ыыппыппыт. Онуоха улууспут баһылыга Алексей Михайлович Иннокентьев биһиэхэ улахан күүс, тирэх буолар. Баһылыкпыт байыаннай дьайыылар бара турар сирдэригэр сулууспалыы сылдьар биир дойдулаахтарбытыгар хаста даҕаны тиийэн, “улуускут дьоно-сэргэтэ ыыппыт кэһиилэрэ” диэн бу көмөлөрбүтүн илдьэн туттартаабытыгар махталбытын тиэрдэбит.
Дойдубут Аҕа баһылыга В.В.Путин Федеральнай Мунньахха Этиитигэр байыаннай дьайыыларга сырдык тыыннара быстыбыт уолаттарбыт дьиэ кэргэттэригэр көмөлөһөр анал пуонданы арыйыахха диэн этиитин биһирии иһиттим. Эйэлээх олох туһугар хайа баҕарар олоҕун толук уурбут дьон умнуллуо суохтаахтар, кинилэр дьиэ кэргэттэрэ сөптөөх көмөнү, өйөбүлү ылыахтаахтар дии саныыбын.