Айталина Никифорова-Шадрина «Багдааһайдар» диэн тохсус кинигэтэ күн сирин көрдө

Суруналыыс, суруйааччы Айталина Никифорова-Шадрина «Багдааһайдар» диэн тохсус кинигэтэ күн сирин көрдө.

Кинигэ сүрэхтэниитэ ыам ыйын 20 күнүгэр Национальнай бибилэтиэкэҕэ буолла. «Далбар Хотун» диэн кэрэ аҥаардарга аналлаах өрөспүүбүлүкэҕэ соҕотох сурунаал бас эрэдээктэрин эҕэрдэлии элбэх киһи кэлбит. Кинилэр ортолоругар үлэлиир кэлэктиибэ, суруйааччылар, суруналыыстар, доҕотторо, чугас дьоно уонна кини суруйар талааныгар сүгүрүйээччилэр бааллар. «Сахабэчээт» генеральнай дириэктэрин сүбэһитэ, көмөлөһөөччүтэ Валентина Бочонина көрсүһүүнү иилээн-саҕалаан ыытта. Кини «Багдааһайдар’ кинигэ кимиэхэ анаммытын, ааптар төрүттэрин туһунан сиһилии кэпсээтэ, ырытта.

Национальнай бибилэтиэкэ үлэһиттэрэ оҥорбут быыстапкалара Айталина Никифорова олоҕун, айар суолун көрдөрөр. Ааптар кинигэтэ Аҕа дойду улуу сэриитигэр Кыайыы 80 сылыгар анаммыт. Бу кинигэҕэ Айталина эбээлээх-эһээтин туһунан суруйуута, пьесата уонна хоһоонноро киирбиттэр.

Айталина Никифорова  кинигэҕэ киирбит хоһоонноруттан Саха тыйаатырын артыыстара:  СӨ үтүөлээх артыыһа Маргарита Борисова,  Юлия Санникова  аахтылар. Ырыанан эҕэрдэни СӨ норуодунай артыыстара Клавдия уонна Герман Хатылаевтар, ырыаһыт Намыына «Ил Түмэн» хаһыат суруналыыһа Галина Матвеева  уо .д. а. тириэртилэр. Саҥа кинигэни, эссе көрүҥүнэн суруллубут кинигэни литературовед, кириитик Валентина Семенова  сиһилии ырытта.

Оттон ааптар бэйэтэ эппитинэн, бу эссе-кинигэтэ — саҕалааһын эрэ.

Надежда Егорова хаартыскаларга түһэриитэ