Айыл Дьулурха: «Ыраас Арктика» бырайыак үлэлиэҕиттэн 3,5 тыһыынча туонна хаарбах тимир хомулунна»

Айыл Дьулурха, СӨ баһылыгын иһинэн экологическай сэбиэт чилиэнэ, «Зеленые» баартыйа эрэгийиэннээҕи салаатын сэбиэтин чилиэнэ, СӨ уопсастыбаннай добровольческай ыстаабын бэрэссэдээтэлэ:

— Саха сирэ «Ыраас Арктика» федеральнай бырайыагы олоххо киллэриигэ бастакы эрэгийиэн буоларын бэлиэтиэхпин баҕарабын. Бу бырайыагы Ил Дархан Айсен Николаев өйөөн, иккис сылын үлэлиир. Бырайыак үлэлиэҕиттэн 3,5 тыһыынча туонна хаарбах тимир  хомулунна.

Саха сиригэр барыта 437 сиргэ өҥнөөх уонна хара  хаарбах тимир   баара биллэр, онтон 84% — Арктика сиригэр-уотугар. Быйыл «Ыраас Арктика» бырайыак ыытыллар сирэ кэҥиэ. Ырааһырдыы аахсыйатын Булуҥ, Дьааҥы, Эдьигээн уонна Усуйаана улуустарыгар ыытар былааннаахпыт.

Арктика экологиятын харыстыыр өссө биир хардыынан Кулаардааҕы көмүс хостуур фабрика кирдээх уутун харайар сирин суох оҥоруу бырайыагын олоххо киллэрии буолар. Бу үлэ 2023 с. түмүктэниэхтээх. Ааспыт сылга «Саханефтегазсбыт» АУо кытары түһэрсиллибит сөбүлэһиинэн Арктикатааҕы нефтебазаны саҥардыыга 1,8 млрд солк. инвестиция көрүллүбүтэ. Бырайыак олоххо киирдэҕинэ эргэрбит нефтебаза хаһаайыстыбатын саҥардыллыы үлэтэ барыа уонна Арктикаҕа куттал суох буолуутун хааччыйыа.

Айсен Николаев улахан көдьүүстээх үлэтин түмүгэр экэнэмиичэскэй сайдыы уонна Арктика айылҕатын, экосистематын харыстааһын тэҥинэн хаачыллыа диэн эрэллээхпин.