Айылҕа алыптаах күүһүнэн бар дьонун санааларын тупсарар баҕалаах Ньургун Павлов

Саха киһитэ тоһуттар тымныылаах уһун кыһын кэнниттэн,  от-мас сириэдийэн турар, сайыҥҥы күн муҥутаан уһуур кэмигэр күөххэ үктэммит үөрүүтүгэр ыһыах ыһар үгэстээх. Ыһыах – бу биһиги сайыны көрсөр, айылҕаттан күүс-уох ылынар бырааһынньыкпыт. Бу сир-сир аайы Үрүҥ Тунах ыһыахтар ыһыллар кэмнэрэ буолар.

Бу күннэргэ анал байыаннай дьайыы кытыылаахтарын дьиэ кэргэттэрэ, элбэх оҕолоох ыаллар, доруобуйаларыгар хааччахтаах дьон бөлөхтөрө Өлүөнэ өрүс арыытыгар ыһыах ыстылар. Мустубут дьон уйгулаах ыһыахха өбүгэ үгэһин тутуһан, үрдүк Айыылартан көрдөһөн, алгыс иҥэринэн, уохтаах кымыһы иһэн, оһуокай, тойук, хомус дьикти алыбыгар уйдаран, түһүлгэҕэ төбүрүөннээн олорон ирэ-хоро кэпсэтэн, быыппастар былчыҥнаахтары, кус быһыйдары сөҕө-махтайа көрөн, сыллааҕы сылааларын таһаардылар. Маннык үчүгэй ыһыаҕы  Нюргун Павлов уонна Мария Спиридонова тэрийэн, дьоҥҥо-сэргэҕэ бэлэхтээтилэр. Ньургун Павлов «Кочевник» катамараан хапытаана – кини үһүс сылын  сайын аайы анал байыаннай дьайыы кыттыылаахтарын дьиэ кэргэттэрин, төрөппүттэрин, волонтердары буор босхо Өлүөнэ очуостарынан, Тукулаанынан сынньата, лууктата илдьэр. Онон «Өлүөнэ өрүскэ сынньалаҥ» диэн бөлөх тэриллэн, баҕалаах дьон бары сылдьар эйгэтэ тэрилиннэ. Быйыл аны арыыга илдьэн ыһыахтатта. Маннык айылҕаҕа сылдьан дьон туруга тупсар, доруобуйата чөлүгэр түһэрэ саарбаҕа суох. Айылҕалыын алтыһыы, чэбдик салгыҥҥа сылдьыы туохтааҕар да ордук буоллаҕа.

Бэлиэтээн эттэххэ, бырааһынньык спонсордарынан «Биир ньыгыл Арассыыйа» баартыйа, Нуучча географическай уопсастыбата, «Hunterhelp» хампаанньа, о.д.а. буоллулар.

Күүстээх санаалаах, амарах дууһалаах Ньургун Павлов наҕараадаҕа, аакка-суолга таласпат, кини ис дууһатыттан дьоҥҥо көмөлөһөр, ыраас санааны үөскэтэр, айылҕа алыптаах күүһүнэн бар дьонун санааларын тупсарар баҕалаах. Ол да иһин дьон махталын ылыан ылар.

«Сахабыт сиригэр Үрүҥ Тунах ыһыахтар саҕаланнылар. Биһиги күн муҥутаан уһаан турар кэмигэр «Отдых на реке Лена» бөлөҕүнэн өрүс арыытыгар баран, ханнык да ыһыахтан итэҕэһэ суох, бэртээхэй ыһыахха сырыттыбыт. Наһаа үчүгэй кэнсиэр буолла. Сахалыы киинэ сериалларыгар оонньообут артыыстар, «Саха» НКИХ тэрийбит +50 ырыа күрэҕин  кыттыылаахтара, кэнсиэри өссө тупсаран биэрдилэр. Маннык үчүгэй сынньалаҥы тэрийбит дьоҥҥо – катамараан хапытааныгар Ньургун Павловка, сүрүннүүр администраторга Мария Спридоноваҕа уонна кинилэр көмөлөһөөччүлэригэр ис сүрэхпиттэн махтанабын. Быйылгы ыһыахха Горнай, Сунтаар курдук ыраах улуустартан кэлэн уонна АГАТУ устудьуоннара көхтөөхтүк кыттан, түһүлгэни улаханнык киэргэттилэр. Бу курдук куруутун олох үөһүгэр сылдьыҥ. Тус олоххутугар, дьиэ кэргэттэргитигэр дьолу-саргыны баҕарабын. Ыарахан балаһыанньаҕа сылдьар анал байыаннай дьайыы кыттыылаахтарын дьиэ кэргэттэригэр тэрийбит ыһыаххыт үрдүк таһымҥа ааста. Наһаа үчүгэй бириистэри туруорбут бары спонсордарга улахан махтал. Сиэн уолбунаан Сарыалбынаан-Өрүөлбүнээн дьонтон итэҕэһэ суох сананан сүргэбит көтөҕүллэн кэллэ», — диэн байыаннай дьайыы бэтэрээнин ийэтэ  Э.А. Михайлова санаатын үллэстэр.

«Наһаа үчүгэй ыһыаҕы тэрийбиттэригэр махталбын тиэрдэбин. «Якутия с тобой» волонтердара ох курдук оҥостон бараннар, ыытыллар тэрээһиҥҥэ барытыгар көхтөөхтүк кыттаннар, өссө Кыайыы өрөгөйүн билэннэр үөрүү-көтүү бөҕөлөр. Бары да олус үөрдүбүт. Ньургун Павловка уонна Мария Спридоноваҕа үтүө дьыаланы оҥороллорун, ыарахан санааҕа ыллара, үлэҕэ сылдьар дьоҥҥо үөрүүнү бэлэхтииргит иһин улахан махталбын тиэрдэбин. Үтүөҕүт сүүс төгүл үтүөнэн эргийдин, дьон махталын ыла туруҥ!», — диэн «Якутия с тобой» бэрэссэдэтэлэ Анна Ефимова махталын тиэрдэр.