“Айылҕаана” түмсүү «Манчаары оонньууларыгар» ураты бэлэҕи туттарда

Ыам ыйын 19 күнүгэр, «Манчаары оонньуулара» ыытыллара 50 күн хаалбытынан, Ытык Күөлгэ “Алгыс” балаҕаҥҥа олус долгутуулаах  бэлиэ түгэн буолла. Бу туһунан «Таатта» хаһыат ТГ-ханаала иһитиннэрдэ.

Ол курдук, Таатта улууһун култуураҕа салаатын көҕүлээһининэн, Екатерина Бурнашева салайааччылаах “Айылҕаана” эбээлэр түмсүүлэрэ буолаары турар “Манчаары оонньуулара” XXII спартакиадаҕа анаан дьоһун бэлэҕи туттарда.

Сылгы кылыттан “Тойон сөрүө” технологиянан оҥоһуллубут 171 см үрдүктээх, 89 см туоралаах, 530 миэтэрэ хатыллыбыт ситиинэн оҥоһуллубут панно “Манчаары оонньууларын” киэргэтиэ. Манна оонньуулары успуорт 11 көрүҥнэрин пиктограммаларын маҥан олбоххо хара сиэлинэн баттах курдук өрөн ойуулаабыттар. Бу ойуулар хонуулара үөһээ аллараа үстүү бүтэй күрүөлээх. Панно үөһээ өттө Таатта талаҕыттан оҥоһуллубут, үрдүгэр үс Дьөһөгөй оҕото, икки кытыыларыгар маҥан дэйбиирдэр, панно аллараа өттүгэр хара, маҥан, кугас сиэлинэн Салгын Кут, Ийэ Кут, Буор кут бэлиэлэрэ бааллар.

Панно худуоһунньук П.С. Доргуев эскииһинэн оҥоһуллубут. Кылынан өрүү технологиятыгар Туора Күөлтэн норуот маастара В.Н. Потапова кэлэн көрдөрөн, сүбэлээн үөрэппит. Туорай маһын оҥорорго Алгыстаана Сырдык Ай салайааччылаах “Сатабыл” оҕону сайыннарар киин күүс-көмө буолбут. Бу оҥоһук эбээлэр этэллэринэн сырдыгы сыдьаайар, арчылыыр, харыстыыр аналлаах.  Дьэ, бу сөҕүмэр, мындыр, дириҥ ис хоһоонноох уус-уран оҥоһугу 14-с сылын үлэлиир “Айылҕаана” түмсүү 60-89 дылы саастаах 35 ыал эбээлэрэ, айыы санаалаах Далбар Хотуттар имигэс илиилэринэн имэрийэн, сүрэхтэрин сылааһынан угуттаан сылтан ордук кэмҥэ оҥорбуттар.

Бу бэлиэ тэрээһиҥҥэ улууспут аҕа баһылыга А.С. Бурцев, баһылык социальнай боппуруостарга солбуйааччыта С.В. Сунхалыров, Таатта нэһилиэгин баһылыга Е.И. Павлов, Таатта норуодунай тыйаатырын дириэктэрэ Г.Г. Вырдылин, уус уран салайааччыта В.Ф. Бурнашева, улуус дьахталларын сэбиэтин бэрэссэдээтэлэ В.И. Будикина, спорткомитеттан Н.Н. Власов эҕэрдэ тылы эттилэр, дириҥ махталларын тиэртилэр. Бу дьоһун бэлэх саҥа тутуллубут А.Е. Турнин аатынан успуорт уораҕайын саамай көстүүлээх сиргэ ыйаныаҕа.