“Айылгы” туосчуттар түмсүүлэрэ 21 миэтэрэ уһуннаах туос киэргэтиилээх саламаны оҥордулар

Манчаары оонньуулара буолара биэс хонук хаалбыт күнүгэр, Булуҥ сэлиэнньэтин олохтооҕо, Саха Өрөспүүбүлүкэтин уус-уран оҥоһуктарын маастара Матрена Малышева салайааччылаах “Айылгы” туосчуттар түмсүүлэрэ 21 миэтэрэ уһуннаах туос киэргэтиилээх саламаны, маастар Матрена Михайловна оҥорбут Кэһэх оһуор-удьуор утума паннону уонна Таатта улууһун Бэтэрээннэрин сэбиэтэ тикпит олбохторун, улуус баһылыгар Айаал Бурцевка туттардылар.

Салайааччы Матрена Михайловна: “Биһиги түмсүүбүт 2017 с. тэриллибитэ. Тумус туттар киһибит Мандар Уус Моҕол Ураһатын тутуутуттан тирэхтэнэн, өбүгэ ииһин тыынын бэйэбитигэр иҥэринэн, нэһилиэкпит, улууспут саха итэҕэлин тутуһан, биир санаанан, кэмҥэ сөп түбэһиннэрэн сайдыыны түстүү, сомоҕолоһон олорорбут туһугар өбүгэ үгэһин күннээҕи олохпутугар тутуһа сылдьар сыалтан “Түөрт саханы төрөт, үс саханы үөскэт” диэн Кэһэх оһуору уонна саха төрдө буолбут ынах-сылгы бэлиэлээх, ыаҕыйалардаах 21 миэтэрэ уһуннаах саламаны, улууспут Аҕа баһылыгар Айаал Бурцевка туттардыбыт. Бу саха кутун-сүрүн, олоҕун-дьаһаҕын көрдөрөр 21 миэтэрэ уһуннаах салама илии сылааһынан оҥоһуллубутун курдук, улуус олохтоохторо бука бары сиэттиспитинэн, биир санаанан үлэлиэхтээхпит, олоруохтаахпыт, сайдыыны түстүөхтээхпит. Маннык күүс дьиҥ сахалыы куттаах Таатталарга, биһиэхэ, хааммытыгар баар!” — диэн эттэ.

Онтон улуус Бэтэрээннэрин сэбиэтин биир сыл устата үлэлэммит бырайыагынан, 200-тэн тахса олбох тигилиннэ. Хас биирдии олбох улууспут тайаан сытар нэһилиэктэрин көрдөрөр өҥнөрүнэн аттарыллан тигилиннэ. Ол курдук, Алдан, Амма өрүстэр халлаан күөх, алаас сирдэр от күөх, уустар уутуйан үөскээбит Баайаҕалара дьэрэкээн ойуунан тигилиннилэр. Олбохтор ойууларын Саха Өрөспүүбүлүкэтин норуотун маастара Арина Большакова оҥордо. Бу курдук Манчаары оонньууларын чэрчитинэн ыытыллыбыт икки бырайыак олоххо киирдэ. Булуннар эппиттэрин курдук, “биир сомоҕо буолуу- сайдыы төрдө”.

Улуустааҕы Манчаары оонньууларын пресс-киинэ