«Айыы кыһатын» үөрэнээччилэрэ «Патриот» ыччат киинэ аһыллыытын киэргэттилэр

Ахсынньы 16 күнүгэр Дьокуускай куоракка өр күүтүллүбүт «Патриот» ыччат киинин үөрүүлээх арыллыыта буолла.

Бу – өрөспүүбүлүкэ ыччатын патриоттуу тыыҥҥа иитиигэ улахан суолталаах бэлиэ түгэн. Киин арыллыыта өрөгөйдөөхтүк эрээри истиҥник ааста, тэрээһин көхтөөх ыччаты уонна кинилэр уһуйааччыларын, үөрэх үлэһиттэрин, былаас бэрэстэбиитэллэрин түмтэ.

Дьоро күнү «Айыы кыһата» национальнай гимназия айар куруһуоктарын салайааччылара ыыппыт маастар-кылаастара чаҕылхайдык киэргэттилэр. Ол курдук, «Айыы оҕото» тыйаатыр студиятын салайааччыта Алина Герасимова сыана ускуустубатын көрдөрдө, «Дорҕоон оһуора» куруһуок салайааччыта Сахая Нохсорова хомуска оонньуурга үөрэттэ, «Дьири-дьир» куруһуок салайааччыта Ольга Копырина кырыымпанан оонньуу кистэлэҥнэрин билиһиннэрдэ.

Национальнай гимназия үөрэнээччилэрэ уһуйааччыларынаан бэлэмнээбит бырагыраамалара тэрээһин кыттыылаахтарыгар уонна ыалдьыттарыгар саха төрүт үгэстэригэр уонна фольклоругар умсан ылар кыаҕы биэрдэ. Маастар-кылаастары оҕо аймах дьиҥнээхтик сэҥээрбитин чаҕылыспыт харахтартан уонна сүргэлэрэ көтөҕүллүбүт сырдык сэбэрэлэриттэн тута таайыахха сөп. Куруһуоктар салайааччылара маннык бырайыактар патриотизмы иитиигэ уонна култуура нэһилиэстибэтин харыстааһыҥҥа олус суолталаахтарын чорботон бэлиэтээтилэр. Кинилэр «Айыы кыһата» национальнай гимназия сүрүн соруктарыттан биирдэстэрэ Дьокуускай куоракка саха төрүт култууратын харааннааһын уонна сайыннарыы буоларын бэлиэтээтилэр.

«Биһиги өрөспүүбүлүкэбитигэр үөрэҕин эйгэтигэр национальнай компонент уонна оскуола оҕолорун регион историятыгар уонна култууратыгар үөрэтии болҕомто киинигэр сылдьар. Биһиги үөрэнээччилэрбит төрүт үгэстэрин таптыыр уонна төрүт култуураларын билэр дьон буола үүнэн тахсыахтара диэн эрэнэбин. Онуоха «Патриот» ыччат киинэ биһиги оҕолорбут айымньылаах идеяларын олоххо киллэрэллэригэр кыах биэрэн уонна кинилэргэ патриоттуу тыыны иҥэрэн бигэ тирэх буолуоҕа», — диэн «Айыы оҕото» тыйаатыр студиятын салайааччыта Алина Герасимова бу бэлиэ күн туһунан санаатын үллэһиннэ.

Үөрүүлээх аһыллыы чаҕылхай шоу-бырагырааманан уонна санаа атастаһыынан түмүктэннэ. Кэнэҕэски өттүгэр «Айыы кыһата» национальнай гимназия «Патриот» ыччат киинин кытта ыкса бииргэ үлэлэһэрэ торумнанар. Саҥа тэриллибит киин өссө элбэх ыччаты хабан, саҥа бырайыактар нөҥүө сөптөөх эйгэни үөскэтэн, гражданскай эппиэтинэстээх буоларга уонна култуура нэһилиэстибэтин сайыннарарга үлэлэһиэҕэ.

 

«Айыы оҕото» тыйаатыр студията