«Айыы санаа айана» — Өймөккөөҥҥө ыытыллыбыт Олоҥхо ыһыаҕын күндү бэлэҕэ

2023 сыллаахха ыытыллыбыт Олоҥхо ыһыаҕа онно сылдьыбыт дьон өйүттэн-санаатыттан билигин да күндүтүк ахтыллар тэрээһининэн буолар.

Бүгүн Өймөкөөн оройуона Байаҕантай улууһуттан арахсан, туспа улуус буолан, сайдыы суолун тутуспута 105 сылыгар анаммыт тэрээһиннэр чэрчилэринэн “Айыы санаа айана” (“Путь к добру”) диэн хаартысканан дьүһүйүү кинигэ-альбом сүрэхтэниитэ буолла. Кинигэ матырыйаалларын Спиридон Слепцов уонна Аксинья Сивцева хомуйан оҥорбуттар. Былатыан Ойуунускай аатынан литературнай  түмэлгэ Өймөкөөн улууһуттан төрүттээх биир дойдулаахтар, Тымныы полюһунан биллэр улуус сайдыытыгар кылааттарын киллэрбит дьон Олоҥхо ыһыаҕын тэрийиигэ көмөлөспүт култуура диэйэтэллэрин, артыыстары, суруналыыстары кытта көрүстүлэр, санааларын атастастылар.

Ол курдук, эдэр олоҥхоһут, билимҥэ ситиһиилээхтик үлэлии сылдьар учуонай Юрий Борисов Өймөкөөн улууһун биэс нэһилиэгин кэрийэ сылдьан олоҥхолообутун иһин махтал тылларын анаата. “Ханнык да улууска миигин бу курдук ытыска түһэрэн илдьэ сылдьан оҕотуттан саҕалаан, кырдьаҕас дьонугар тиийэ олоҥхобут истэ иликтэр, онон Өймөкөөн улууһун култуураҕа управлениетыгар истиҥ махталбын тиэрдэбин”, диэн махтанна Юрий Борисов уонна үөрүүтүттэн олоҥхолоон доллоһутта.

Олоҥхо сценарийын суруйбут Майя Власьева ыраах хоту улууска бэрт чугастык алтыһан ааспыт дьонугар истиҥ махталын тиэртэ.

“Бастаан утаа Өймөкөөн эр дьонун кытта кэпсэтэрбэр «ньиэрбэм оонньообута»: бу санааларын саҥаран-этэн испэттэрин! “Көрөн иһиллиэ…” диэн холкутук унаарытан кэбиһэллэр. Мин “суох, ол эһиги сыыйа-баайа көрөн иһэргит-истэргит наадата суох. Миэхэ сибилигин наада, итини баар гыныҥ , ону аҕалыҥ” диибин. Кэлин өйдөөбүтүм, Өймөкөөн эр дьонун курдук эрэллээх, киэҥ көҕүстээх саха эр дьоно ахсааннаах эбит. Олох кэмигэр барытын бүтэрэн-оһорон иһэллэр. Биир кэмҥэ үтүмэн сылгы, кулунчук турар буолар, сотору кэминэн өйдөөн көрбүтүм ол сиргэ биир да сылгы, ат суох буолар. Хаһан барытыгар түргэнник үүрбүттэрэ буолла. Оннук барытын чопчу, саҥата суох, быр-бааччы оҥорон иһэллэр этэ. Онтон ыла Өймөкөөн эр дьонун олох эрэллээх дьонунан ааҕабын” диэн туран, Тымныы полюһун мааны Далбар  хотуттарын эмиэ итинник олус бэркэ ойуулаан холобурдаата. Киһи Майя Власьевавны истэ олоруох курдук кэпсээннээх буолан биэрдэ. Ити түгэҥҥэ бары да Олоҥхо ыһыаҕар сылдьан, дьоҥҥо-сэргэҕэ биллибэккэ хаалбыт үгүс түбүктээх үлэҕэ кинилиин тэҥҥэ “киирэн” ыллыбыт.

… Ити курдук, Өймөкөөн улууһугар “Айыы санаа айана” тосхолунан ыытыллыбыт Олоҥхо ыһыаҕын туһунан бэртээхэй ахтыы күнэ буолан ааста. Өрөспүүбүлүкэ Олоҥхо ыһыахтарын ыытар бас-көс дьон бу күн литературнай түмэлгэ көрсөн баран, “Өймөкөөн дьоно-сэргэтэ Олоҥхоҕут ыһыаҕын курдук өрөспүүбүлүкэҕэ эмиэ бастыҥ холобуру көрдөрдүгүт. Биир да улуус Олоҥхо ыһыаҕын кэнниттэн маннык кинигэ-альбому таһааран баран, барыбытын бииргэ түмэн, улахан түмүк дьоро күнү тэрийэ илик” диэн санааларын эттилэр.

“Айыы санаа айана” кинигэ, аата да этэрин курдук, хас биирдии киһи ис кутун уһугуннаран, өрүү сырдыгы эрэ сыдьаайа туруоҕа!