Аккырыыкка куонкуруһугар саха оҕолоро кытталлар

Москватааҕы Кыайыы мусуойа тэрийбит «Аҕа дойдуну көмүскээччилэр» Бүтүн Арассыыйатааҕы куонкуруска 2 тыһыынчаттан тахса үлэ киирдэ. Кыттааччылар олунньу 23 күнүгэр анаммыт аккырыыкканы уруһуйдуохтаахтар. Бу куонкуруска 14 саастаах Айсиэнэ Иванова эмиэ кыттар.

Айсиэна Иванова уруһуйа.

Аккырыыккаларга урукку, билиҥҥи кэм дьоруойдарын, байыаннай сулууспалаахтары, мэтээллэри, уордьаннары, бойобуой тиэхиникэни, георгиевскай лиэнтэни, сулуһу, о.д.а. бэлиэлэри уруһуйдаабыттар.

Куонкуруска үлэлэри олунньу 12 күнүгэр диэри туталлар. Ханнык баҕарар кыраасканан, уруһуй ньыматынан уруһуйдаммыт буолуон сөп. Кыттааччылары саастарынан: 6-8, 9-11, 12-14, 15-17 саастаах оҕолор уонна улахан дьон диэн араараллар.

Кыайыы мусуойун саайтыгар аккырыыккалар виртуальнай быыстапкалара аһыллыаҕа. Олунньу 17-22 күннэригэр саайтка киирэн, ким баҕарар куоластыан, эбэтэр, аккырыыкканы электроннай буостанан доҕотторугар, билэр дьонугар ыытыан сөп. Бастыҥ аккырыыккалары талан, бэчээттиэхтэрэ уонна кыайыылаахтарга бэлэхтиэхтэрэ. Аккырыыккалар буостаҕа атыыланыахтара.