«Алаас-Ас» — бастыҥ тэрилтэ

Хорообут нэһилиэгин баһылыга Гаврил Бродников аара көрсөн «Алаас-Ас» тыа хаһаайыстыбатын потребительскай кооперативыгар илтэ. Онон аан бастаан Хорообут нэһилиэгэр таһаарыылаахтык үлэлии турар «Алаас-Ас» тыа хаһаайыстыбатын потребительскай кооперативыгар сырыттыбыт. Манна үүт аһы-үөлү оҥорон таһаараллар.

Биһиги киирбиппитигэр «Алаас-Ас» кооператив үлэһиттэрэ уонна бэрэссэдэтээтэлэ Светоний Шестаков көрүстүлэр. Бэрэссэдээтэл суруналыыстарга тута үлэ-хамнас туһунан кэпсээтэ.

«Биһиги тэрилтэбит 2016 с. тэриллибитэ. Ол эһиилигэр маннык сыаҕы туттуохха диэн былааннаммыппыт. 2023 с. ол баҕа санаабыт туолан, балаҕан ыйыгар олоххо киирбитэ. Мин манна үһүс сылын үлэлиибин. Бу кооперативы аҕа кынным, тыа хаһаайыстыбатын үтүөлээх үлэһитэ Прокопий Плотников тэрийбитэ. Ороскуоппут сорох чааһын судаарыстыба толуйбута. Сыахпытын туттарбытыгар уонна оборудование ыларбытыгар субсидия быһыытынан иккитэ көмө ыллыбыт. Билигин лаборатория сакаастаан олоробут. Ааспыт сылга 518 туонна үүтү астаатыбыт», — диэн Светоний Шестаков.

Кооперативка уопсайа 6 киһи үлэлиир, орто хамнастара 48230 солк. эбит.  Биир үлэһит эдэр исписэлиистэри өйүүр бырагырааманана ый аайы эбии төлөбүр ылар.

2023 сылга сууккаҕа 2 туонна кыамталаах үүтү астыыр ​​саҥа собуот үлэҕэ киирэн, саҥа оборудованиенан толору хааччыллан олоробут диэн салаайааччы кэпсиир. Ол курдук материальнай-техническэй бааза төһө кыалларынан саҥардыллыбыт.

Ааспыт сыллаах былаан 400 туонна буоллаҕына, 518772,1 кг үүт переработкаламмыт. Ол иһигэр «Хорообут» 472215,1 кг, САМО бааһынай хаһаайыстыбата 22820 кг, ИП Курилкин 13523 кг, «Кырымах» 10214 кг туттарбыттар. 18 029,9 кг ынах арыыта, 10210 кг чөчөгөй оҥоһуллубут.

Үлэһиттэр суруналыыстарга хайдах арыыны оҥороллорун көрдөрүлэр. Өр сылларга тыа хаһаайыстыбатын оҥорон таһаарыытыгар үлэлээбит, билигин кооператив тутаах үлэһитэ Дария Борисова санаатын үллэстэр: «Мин 1985 сыллаахха Майа эт кэмбинээтигэр бастаан оробуочайнынан, үөрэнэн, онтон маастарынан, кэнники технологынан үлэлээбитим. Билигин лаборанныыбын. Уопсайа 23 сыл маастардаатым, араас элбэх дьону кытары үлэлээтим. Билигин үлэлииргэ усулуобуйа барыта баар. Биһиги оҥорон таһаарар бородууксуйабыт барыта натуральнай, онон нэһилиэнньэ хамаҕатык ылар».