«Аламай таас»: саамай кытаанах таас күүстээх доҕордоһуу бэлиэтинэн буолбута

Элбэх көрөөччү көрдөһүүтүнэн, “Аламай таас” сэрийээли көрбөтөх дьоҥҥо “Саха” НКИХ өссө төгүл хатылыаҕа.

 Алмаас бырамыысыланнаһыгар – өрөспүүбүлүкэ бүддьүөтү оҥорор салаатыгар үлэлиир ыччат туһунан уонна олох атын да тиэмэлэрин таарыйар саха бастакы сэрийээлин кулун тутарга көрдөрүөхтэрэ.

Кулун тутар 17 күнүттэн муус устар 10 күнүгэр диэри хатыланар сэрийээл нуучча тылыгар субтитрдаах буолуоҕа.

Сэрийээл сүрүн дьоруойдара Мииринэйгэ олороллор уонна үлэлииллэр. Онон,  көрөөччү Мииринэй куораты эрэ буолбакка, бырамыысыланнас эбийиэктэрин иһин-таһын билсиэҕэ, ону сэргэ ыраах тайҕаҕа уһуллубут сыаналар бааллар. “Саха” НКИХ сэрийээллэри устар  сулууспатын салайааччы Марфа Пермякова эппитинэн, “Аламай таас” сэрийээл биир соругунан бырамыысыланнаска үлэни кытары ситимнээх идэлэргэ ыччат болҕомтотун тардыы буолар.

«Холобур, биһиги сэрийээлбит дьоруойдарынан геодезист, геофизик, суоппар, диспетчер буолаллар. Ол гынан баран, бу идэ бэрэстэбиитэллэрэ экран дьоруойдарын курдук эрэ үлэлииллэр  диэн буолбатах. Биһиги маннык идэлэр бааллар диэн көрдөрүөхпүтүн баҕарбыппыт. Туох да диэбит иһин, сэрийээлгэ дьиҥнээх геофизиктар уонна геодезистар буолбатахтар – кинилэр уобарастара”,—диэн Марфа Пермякова бэлиэтээн этэр.

Сэрийээл саҥа ааттары арыйда – ыччаттар оруолларыгар  ис сүрэхтэриттэн оонньоотулар уонна көрөөччүлэр сөхпүттэрин-махтайбыттарын биллэрдилэр. Ааптардар,  төһө да дьиҥнээх баары бигэргэтээри,  сэрийээлгэ документальнай каадырдары киллэрбиттэрин да иһин, бу документальнай киинэ буолбатаҕын бэлиэтииллэр.  Ону таһынан сэрийээлгэ оҥорон таһаарыыны кытта сибээстээх олус элбэх сыана баар. Мииринэйгэ бырамыысыланнас локацияларыгар үлэлиир кыах бэриллибитэ сэрийээл ааптардара дьиҥнээх хартыыналары көрдөрөллөрүгэр көмөлөспүтэ. Онтон Мииринэй куорат тас көстүүтэ сэрийээли киэргэппитэ, дьон бары сөбүлээбитэ.

Сэрийээлгэ  биир сүрүн оруолу АЛРОСА бөлөх “Анаабыр алмаастара” хампаанньатын хайа маастара Павел Сидоров оонньообута. Кини дьоруойа Игнат – спортсмен, күүстээх-уохтаах уонна холку майгылаах”. Ол гынан баран, кини элбэх эрэйи-муҥу көрсөр.

«Кастинг, сэрийээлгэ уһуллуу – миэхэ бастакы уопут. Сюжета атын сэрийээллэртэн биллэ уратылаах буолан,  киһини кэрэхсэтэр. Дьиҥнээх баары көрдөрөллөрүн сөбүлээбитим, киһини толкуйдатар. Сэрийээли көрөн баран, элбэх ыччат бырамыысыланнаска үлэлии кэлиэҕэр эрэниэхпин баҕарабын.

Мин бэйэм 2022 сылтан “Анаабыр алмаастара” хампаанньаҕа хайа маастарынан үлэлиибин. Биһиги сэрийээлбитин устарга көмөлөспүт  хампаанньаҕа олус махтанабын. Үлэлиир хампаанньабар сайдыыны уонна ситиһиилэри баҕарабын”, — диир Павел.

Көрөөччүлэр “саха дораматынан” ааттаабыт “Аламай таас” сэрийээллэригэр хас биирдии көрөөччү кини туһугар ыалдьар уонна үөрэр-көтөр бэйэтин дьоруойун булуоҕа.

АЛРОСА пресс-сулууспатын суруйуутуттан тылбаас