Алампа аатынан норуот бириэмийэтин алтыс төгүлүн туттарыахтара

Сэтинньи 14 күнүгэр Анемподист Иванович Софронов-Алампа аатынан норуот бириэмийэтин туттарыы  алтыс төгүлүн ыытыллыаҕа.

Алампа кэриэһин үйэтитэр уонна ускуустуба эйгэтигэр уһулуччу ситиһиилээх дьону бэлиэтиир бириэмийэни туттарыы сиэрэ-туома быйыл Национальнай ойуулуур-дьүһүннүүр түмэлгэ буолуоҕа.

Сыл ахсын сэтинньи 14 күнүгэр, Алампа төрөөбүт күнүгэр, саха уус-уран литературатын, бэчээтин төрүттэһээччи, прозаик, драматург, бэйиэт, тылбаасчыт, саха тыйаатырын бастакы дириэктэрэ, саха омук духуобунай лиидэрэ  Анемподист Иванович Софронов-Алампа аатынан бириэмийэни туттарыы тэриллэр буолбута.

1935 сыл алтынньы 22 күнүгэр А.И. Софронов Саха сиринээҕи сэбиэскэй суруйааччылар сойуустарыгар туһаайбыт кэриэс суругар литературнай нэһилиэстибэтиттэн киирбит үптэн сахалыы суруллубут бастыҥ драматическай айымньыга кини аатынан бириэмийэ олохтонуохтааҕа ыйыллар. Бу кэриэс суругу XXI үйэ эдэр интеллигенцията, чуолаан “Алампа” айар аймах түмсүүтэ олоххо киллэрэрэ үгэскэ кубулуйда.

Бу  Саха сирин бары айар сойуустарын, түмсүүлэрин — суруйааччылары, худуоһунньуктары, киинэ, тыйаатыр үлэһиттэрин, муусука айааччылары сомоҕолуур, холбуур бириэмийэ буолар.