«Алампа» уопсастыбаннай бириэмийэ лауреаттара ааттаннылар (видео)

Култуура уонна ускуустуба салаатын бастыҥнарыгар ананар «Алампа» уопсастыбаннай бириэмийэ быйыл төрдүс төгүл туттарылынна. Кыайыылаахтары уопсастыбаннас уонна айар сойуустар бэрэстэбиитэллэрэ талаллар. 

 Саха литературатын төрүттээччилэриттэн биирдэстэрэ, классик суруйааччы, бэйиэт,  драматург Анемподист Иванович Софронов-Алампа төрөөбүт күнүгэр, сэтинньи 14 күнүгэр, «Алампа» уопсастыбаннай бириэмийэ туттарыллыбыта икки бүк үөрүүлээх буолла.
Алампа 1935 сыллаахха алтынньы 22 күнүгэр Саха сиринээҕи сэбиэскэй суруйааччылар сойуустарыгар туһаайан, сахалыы суруллубут дыраама бастыҥ айымньытыгар кини аатынан бириэмийэни олохтуурга кэриэс этэн хаалларбыта. Ол да иһин, аныгы кэмҥэ кини аатынан бириэмийэни олохтооһун саха ускуустубатын түөрэҕин түһэрсибит бэйиэт  кэриэһин толоруу, кини үрдүк аатыгар сүгүрүйүү бэлиэтинэн буолар.

Өксөкүлээх Өлөксөй аатынан Норуоттар доҕордоһууларын дьиэтигэр бириэмийэни туттарыы сиэрин-туомун Б.Ойуунускай аатынан Саха тыйаатырын артыыһа, СӨ Судаарыстыбаннай бириэмийэтин лауреата Айаал Аммосов уонна суруналыыс, бэйиэт, психолог Яна Байгожаева ыыттылар.
Биллэрин курдук,  «Алампа» бириэмийэ аан бастаан 2019 сыллаахха, Арассыыйаҕа Тыйаатыр сылыгар олохтоммута кэрэхсэбиллээх.
Быйылгы бириэмийэ лауреаттарынан кимнээх буоллулар, талааннаах скульптор Николай Чоччасов оҥорбут статуэткаларын кимнээх тутан,  дьол өрөгөйүн биллилэр?

Дьүүллүүр сүбэ быһаарыытынан бириэмийэ 9 номинацияҕа туттарылынна:

«Дархан ойууһут» -– Иннокентий Иннокентьевич Корякин (бириэмийэни туттарда: 2020 с. бириэмийэ лауреата Екатерина Ефимовна Шапошникова);
«Ырыа айааччы» -– Алексей Васильевич Егоров (туттарда: Владимир Петрович Индигирскэй, 2021 с.);
«Киинэ эйгэтин чыпчаал үлэһитэ» — Любовь Пантелеймоновна Борисова (туттарда: Эдуард Алексеевич Новиков, 2019 с.);
«Чаҕылхай артыыс» -– Алексей Прокопьевич Павлов (туттарда: Роман Романович Дорофеев, 2020 с.)
«Чаҕылхай артыыска» -– Елена Дмитриевна Маркова (туттарда: Валентина Григорьевна Семенова, 2019 с.);
«Дэгиттэр режиссер» — Руслан Игоревич Тараховскай (туттарда:   Альбина Андриановна Борисова, 2019 с.)
«Алампаҕа сүдү бэриниилээх» -– Изабелла Александровна Сивцева (туттарда: Петр Николаевич Баснаев, 2021 с.).
«Идэтигэр сүдү бэриниилээх» -– Мария Гаврильевна Боппоенова (туттарда: Владимир Васильевич Ксенофонтов, 2019 с.);
«Өрөгөйдөөх өйөөччү» -– Вячеслав Васильевич Яроев (туттарда: Сардаана Револьевна Саввина, 2019 с.)

“Мин ыллыым ээ, ыллыым…”

Бириэмийэни туттарыы сиэригэр-туомугар лауреаттары уонна бэйиэккэ сүгүрүйэр көрөөччүлэри  “Алампа таптала” кэнсиэринэн Саха академическай  уонна Олоҥхо тыйаатырдарын артыыстара эҕэрдэлээтилэр. Кинилэр Анемподист Софронов тылларыгар, Руслан Тараховскай матыыбыгар ырыалары тыыннаах доҕуһуолунан толордулар. Үйэлээх тапталы туойбут бэйиэт хоһоонноругар аҥаардас биир мелодист айбыт диэтэххэ, элбэх саҥа ырыа ылланна.  Ырыалар  көрөөччүгэ тиийэллэригэр, чуолаан эдэр ыччакка өйдөнүмтүө буолалларыгар,  Олоҥхо тыйаатырын иһинэн үлэлиир “Дорҕоон дойду” бөлөх уонна Олоҥхо тыйаатырын тыыннаах бөлөҕө күүс-көмө буоллулар, тэрээһин ис хоһоонун, аналын  дириҥэтэн биэрдилэр.  Бу күн тыыннаах бөлөххө Иванида Алексеева-Чооруос, Вероника Лыткина, Александр Кысылбаиков  уонна Прокопий Сыроватскай оонньоотулар. Онтон “Дорҕоон  дойдуга” Герасим Павлов уонна  Дмитрий Готовцев бааллар. Кинилэри муусукаалынай салайааччы Леонид Моисеевич Иванов-Лүҥкүр иилээн-саҕалаан илдьэ сылдьар.

Онтон Алампа хоһоонноругар иккис тыыны биэрбит ылбаҕай ырыалары Олоҥхо тыйаатырыттан — Настя Алексеева, Мария Михалева, Валера Саввинов, Иванида Алексеева, Күннэй Николаева уонна Гаврил Менкяров уу сахалыы толордулар.  Саха тыйаатырыттан Александр Борисов, Руслан Тараховскай,  Ильяна Павлова, Елена Маркова, Илья Стручков, Валентин Макаров, Ньургуйаана Шадрина эмиэ ураты матыыпка олорсон, ырыа дьикти-кэрэ киэһэтин бэлэхтээтилэр.

ххх

Саха сирин айар сойуустарын ассоциацията, Олоҥхо тыйаатыра, Алампа сүгүрүйээччилэрэ олохтообут үйэлээх бириэмийэлэрэ инникитин даҕаны  ыччаттарбыт улуу бэйиэккэ  тирэҕирэн үүнэллэригэр-сайдалларыгар олук ууруоҕа.

Сиһилии «Саха сирэ» хаһыат нүөмэригэр ааҕаарыҥ