Альберт Семенов: «Киин куорат олохтоохторун үгүстэрин таарыйар кыһалҕалара этилиннэ»

Альберт Семенов, Дьокуускай куораттааҕы Дуума бэрэссэдээтэлэ:

— Быйылгы туһаайан этиитигэр Ил Дархаммыт Айсен Николаев кэлэр 2025 сылы Ийэ дойдуну көмүскээччи сылынан биллэрдэ. Бу саамай сөптөөх быһаарыныы буолар, биһиги уопсай кыайыыбыт туһугар туох кыаллары барытын оҥоруохтаахпыт. Хас биирдии байыаннай дьайыы кыттыылааҕар, кини дьиэ кэргэнигэр хайаан да ураты болҕомто ууруллуохтааҕын тоһоҕолоон бэлиэтээтэ, бу инники тутуллар биир сүрүн сорукпут буолар.

Айсен Сергеевич Дьокуускай куорат маастар-былаанын олоххо киллэриини кичэйэн эппитин бэлиэтиир наадалаах. Билигин аҕыс бырайыагы олоххо киллэрии саҕаланыахтаах, 900 тыһ. кв. м. иэннээх олорор дьиэ тутуута, 194 саахалланар туруктаах дьиэлэртэн дьону көһөрүү барыахтаах, оччотугар 3000-тан тахса ыал олорор усулуобуйаларын тупсарыахтара. Бу киһини үөрдэр эрэ.

Ону таһынан Ил Дархан үөрэхтээһин, доруобуйа харыстабылыгар болҕомтотун уурда, саҥа эбийиэктэр тутуллаллар. Социальнай гаастааһын куорат олохтоохторун эмиэ биир тыын кыһалҕалара. Онон туһаайан этиигэ куорат олохтоохторун үгүстэрин таарыйар кыһалҕалар этилиннилэр.