Альбина  Фёдорова: «Сэриигэ барбыт оҕобор алгыс»

“Саха сирэ” хаһыат (sakha-sire.ru) хорсун-хоодуот буойуттарбытыгар анаан, дойдуга бэриниилээх буолууга иитэр соруктаах хоһоон куонкуруһун биллэрбитэ.

Куонкуруспут 46-с кыттааччыта Ленскэй Чамчатыттан Альбина  Фёдорова:

Сэриигэ барбыт оҕобор алгыс

Куйах буолар тыллары
Куйаар устун ыытабын,
Алгыс буолар тыллары
Аартыктаргар ыйыыбын.

Саха эрэ буолларгын
Саалаахтан самныма,
Оҕом эрэ буолларгын
Охтоохтон охтума.

Хотуттан холоммут
Хотторон куотуохтун,
Соҕурууттан соруммут
Соруна да барбатын.

Илинтэн илгийбит
Илбиспэр иҥиннин,
Арҕааттан ааҥнаабыт
Арҕаҕар хатаннын.

Түөрт өттүгүн эргиччи
Төгүрүттэҕим буоллун,
Сылдьар ыллыктаргын
Араҥаччылаатаҕым буоллун.

Дойдуҥ дьоно барыта
Алгыс анаан алгыыллар
Кэлэр кэмҥин кэтэһэ
Эрэх турах күүтэбит.