Альбина Поисеева: «Инникигэ эрэли, сайдыыны түстээбитэ»

Ил Түмэн II, III, IV ыҥырыыларын дьокутаата, уопсастыбаннай-бэлитиичэскэй диэйэтэл Альбина Поисеева Өрөспүүбүлүкэ күнүн суолтатын туһунан санаатын үллэстэр:

– Ол сыл, билигин санаан көрдөхпүнэ, күн наар чаҕылыччы тыгара, дьон-сэргэ барыта өрө көтөҕүллүүгэ сылдьара, саҥа тэриллэр өрөспүүбүлүкэбитигэр туох эмэ туһалааҕы оҥордорбут, үчүгэй дьыалаҕа кыттыстарбыт диэн санаалаах курдуга. Устудьуоннар, ыччаттар түмсүүлэрэ күннэтэ Конституциябытын ылына охсуохха диэн дьокутааттарга, былааска  туруорсаллара. Мин оччолорго 12-с ыҥырыылаах Үрдүкү Сэбиэккэ үлэлиирим, онон ол күннэри үчүгэйдик өйдүүбүн. Муус устар саҥатыгар саҥа Конституция аҕы­йах куолас утарыылаах ылыныллыбыта. Оччолорго илиини уунан куоластааһын этэ, саалаҕа теле-суруналыыстар суохтарын бэркэ хомойо санаабытым өйбөр хатанан хаалбыт.

Оччолорго Үрдүкү Сэбиэт бэрэссээдээтэлэ М.Е. Николаев дьокутааттары кытта сөбүлэһэн, 1922 сыллаахха автономия­ны ылыныы устуоруйатын салҕаан, муус устар 27 күнүн Саха Өрөспүүбүлүкэтин күнүнэн биллэрбитэ. Дьон-сэргэ ис-иһиттэн ылынан улахан өрө көтөҕүллүүнэн дьокутааттары, салалтаны кытта бииргэ уулуссаҕа кэккэлээн сэлэлии хааман, Өрөспүүбүлүкэ күннэрин бэлиэтиир буолбуппут. Онно инникигэ эрэл, сайдыы, өрөспүүбүлүкэбитинэн, норуоппутунан киэн туттуу, биир санааланыы көстөрө. Мин санаабар, Өрөспүүбүлүкэ күнэ кэнэҕэски ыччаппыт, Саха сирин хас биирдии олохтооҕун өйүгэр-санаатыгар иҥэр гына иитиэхтэнэн, сылтан-сыл дирбиэннээхтик бэлиэтэнэ туруохтаах.