Албыннаан дьон дьиэтин куортамҥа биэрээччи тутулунна

Дьокуускайга полиция 1 №-дээх дьуһуурунай чааһыгар эр киһи кэлэн, 60 тыһ. солкуобайбын албыннаан уордулар диэн сайабылыанньа киллэрбит.

Суһал-ирдиир үлэ түмүгүнэн холуобунай ирдэбил үлэһиттэрэ уорбаланааччыны чуолкайдаан, 31 саастаах эр киһини туттулар.

Бу киһи кыбартыыраны бас билээччини кытта дуогабар оҥорсоругар, бастаан кыра сууманы биэрэрин туһунан дуогабардаспыт. Толору сууманы киирэн олордохпуна ыытыам диэн тылыгар киллэрбит. Ол кэнниттэн дьиэ хаһаайынабын диэн атын киһиэхэ уһун болдьоххо куортамҥа биэрбит, эбиитин  төлөбүрү барытын төлөппүт. 60 тыһ. солк. ылан баран, сүтэн хаалбыт. Оттон эмсэҕэлээччи дьиҥнээх хаһаайын кэлбитигэр биирдэ албыннаппытын билбит.

Силиэстийэлээһин кэмигэр хара санаалаах өссө биир итинник түөкүннээһини оҥорбута билиннэ. Уорбут харчытын тус бэйэтин наадатыгар ыыппыт. Киниэхэ РФ ХК 159 ыст. 2 ч. “Түөкүннээһин” холуобунай дьыала тэрилиннэ, диэн иһитиннэрэр Саха сиринээҕи ИдьМ пресс-сулууспата.