Албыннаатыбыт диэн киһини эбии ыгылытан “сиир” буолбуттар

Төлөпүөн түөкүттэрэ албыннаабыттарын туһунан билинэр саҥа исхиэмэни киллэрбиттэр.

Бу туһунан РФ ИДьМ информационнай-коммуникационнай технологиялары сокуону кэһэн туран туһаналларын утары охсуһар управлениета иһитиннэрэр.

Бастаан сиэртибэҕэ “мобильнай эпэрээтэр үлэһитэбин” диэн билбэт киһитэ эрийэр. Сибээс өҥөтүнэн туһанар дуогабарыҥ болдьоҕо бүтэн эрэр, ону уһатарга смс нөҥүө кэлбит коду эт диир.

Киһи түөкүҥҥэ коду этэн биэрбитин кэннэ, эрийээччи аһаҕастык кинини албыннаабытын туһунан этэн баран, төлөпүөнүн ууран кэбиһэр.

ИДьМ-ҥэ этэллэринэн, хара санаалаахтар маннык гынан сиэртибэни эбии ыгылытан, өйүттэн таһааран кэбиһэллэр.

Салгыы бу киһиэхэ аны быраабы араҥаччылыыр уорган, Росфинмониторинг эбэтэр гогсуслуга “үлэһиттэрэ” эрийэн тахсаллар итиэннэ харчытын хайдах “быыһыырын” туһунан быһааран бараллар. Ол курдук “куттала суох счекка” харчыгын ыытан баран, баан үлэһиттэрин кытта “куомуннаспыт” түөкүттэри тутуохха диэн этэллэр.