«Алдан» этэр санаата — иэстэһии, өһү-сааһы ситиһии буолбатах…

Арассыыйаҕа, ол иһигэр Саха сиригэр, ыам ыйын 1 күнүттэн көрдөрүллэн эрэр «Алдан» патриотическай дыраама дьоруойун олоҕо биир алдьархайдаах түбэлтэттэн тосту уларыйар. Сөбүлүүр идэтинэн үлэлии сылдьар IТ-урбаанньыт төрөппүт кыыһа хомолтолоохтук өлөн, кини тыына быстыбыт сиригэр, байыаннай дьайыы буола турар сиригэр барар.

«Бу сюжет киинэҕэ төһө да уус-уран толкуй быһыытынан киллэриллибитин иһин, «Алдан» этэр санаата — иэстэһии, өһү-сааһы ситиһии буолбатах, төрөөбүт дойдуга сулууспалааһын», -– диэн киинэ генеральнай продюсера Данила Куликов  суруналыыстарга ыытыллыбыт пресс-кэмпириэнсийҕэ эттэ.

Байыанннай дьайыы кыттыылаахтарын дьоруойдуу быһыыларын туһунан патриотическай дырааманы Арассыыйа бары эрэгийиэнигэр көрдөрүөхтэрэ. Кэмпириэнсийэҕэ иһитиннэрбиттэринэн, «Алдан» Арассыыйа сорох эрэгийиэннэригэр ыам ыйын 15, сорохторго бэс ыйын 1 күнүттэн көстүөҕэ. Онон көрөөччү интэриэһэ баарын тухары быракаат салҕаныаҕа.

««Алдан» -– саха киинэтигэр улахан хардыы. Быйыл быракаакка элбэх дьоһуннаах саха киинэтэ таҕыста. Биһиги кинематографиябыт чахчы иннин диэки баран иһэр уонна «Алдан» киинэнэн эмиэ саҥа таһымҥа таҕыстыбыт. Билигин гибриднай сэрии бара турар: инники кирбиигэ уонна дьон өйүн-санаатын иһин охсуһууга. Арҕаа дойдулар бэйэлэрин сыаннастарын пропагандалаары, Аҕа дойду Улуу сэриитин устуоруйатын токуруталлар. Ол иһин, Арассыыйа култууратын уонна сонуну киэҥник тарҕатар сириэстибэлэрин соруктара -– кырдьыгы этии. Уус-уран контент эмиэ улахан суолталаах», — диэн Саха сирин бырабыыталыстыбатын бэрэссэдээтэлин солбуйаачы Анатолий Семенов устуоруйа кырдьыгын көмүскүүр наадатын бэлиэтээн эттэ.

Киинэ режиссера Дмитрий Кольцов:
«Биһиги дойдубутун иннигэр туох-ханнык эппиэтинэһи сүгэрбитин өйдүүбүт. Онон хас биирдии тыл уонна сыана биһиэхэ улахан суолталаах этэ. Биһиги хамаандабыт чиэһинэйдик үлэлээтэ. Николай Потапов курдук дьоруойдар бу устуоруйаҕа дьоһун миэстэни ылаллар. Кинилэр биһигини истэллэригэр уонна көрөллөрүгэр эрэллээхпит, киинэ кинилэргэ кырдьыктаах дьыалаҕа эрэли, күүһү биэриэҕэ уонна кыайыыны чугаһатыахтара» -– диэн киинэ соругун туһунан кэпсээтэ.

Киинэни устааччылар билигин биһиги ортобутугар баар бэтэрээннэр дойдуну фашизмтан көмүскүүр саҥа көлүөнэни ииппиттэрин көрөллөрө суолталааҕын ыйдылар.
Суруналыыстар киинэҕэ сүрүн дьоруойу уонна «Сунтаар» диэн позывной байыаһы оонньообут Үүнэр көлүөнэ тыйаатырын артыыстара Илья Яковлевка уонна Владимир Охлопковка киинэҕэ хайдах  уһуллубуттарын туһунан  ыйытыылары биэрдилэр.

Онтон РФ үтүөлээх артыыһа Дмитрий Дюжев саха артыыстарын талааннарын, мындырдарын, киинэҕэ оонньуур кыахтарын, кинилэри кытары өйдөһөн үлэлээбиттэрин уонна саха дьонунан киэн туттарын туһунан астына бэлиэтээтэ.

«Алдан» бырайыак — байыаннай дьайыы туһунан Арассыыйа уонна Запорожье уобалаһын холбоһуктаах бастакы бырайыактара. Киинэттэн киирбит үп сорҕотун байыаннай дьайыы кыттыылаахтарын өйүүргэ уонна патриотическай киинэлэри салгыы сайыннарыыыга биэриэхтэрэ.