Алдан икки олохтооҕо 120 тыһ. солк. суумалаах көлүөһэ диискэлэрин уоран тутулуннулар

Алдан икки олохтооҕо тимир суол тэрилтэтиттэн 12 көлүөһэ диискэтин уоран, биэс сылга диэри көҥүллэрэ быһыллыан сөп.

Бу туһунан ИДьМ тырааныспарга Хотугу-Илиҥҥи линейнэй управлениетын матырыйаалларыгар олоҕуран, ИДьМ Уһук Илиҥҥи федеральнай уокуругун тырааныспарга управлениетын пресс-сулууспата иһитиннэрэр.

45 уонна 29 саастаах эр дьоҥҥо РФ Холуобунай кодексатын 158-с ыстатыйатын 2-с чааһынан (уоруу) холуобунай дьыала көбүтүлүннэ. Кинилэр иккиэн бу ыстатыйанан урут сууттаммыттара бэлиэтэнэр. Силиэстийэ барылынан, 29 саастаах Алдан олохтооҕо уоруу буолбут күнүгэр үлэтин сылдьыбыт. Кини видеокамералары арааран, таһаҕас тиэргэнигэр куомуннааҕын киллэрээри шлагбауму аспыт. Кыттыгастаахтар 12  улахан уйуктаах тырааныспар көлүөһэтин диискэтин массыыналарыгар тиэйбиттэр. Кэлин буруйданааччылар уоруллубут баайы-дуолу биллибэт киһиэхэ атыылаабыттар. Тимир суол тэрилтэтигэр оҥоһуллубут хоромньу суумата 120 тыһыынча солкуобайынан сыаналанар. Билиҥҥи туругунан холуобунай дьыаланы силиэстийэлээһин түмүктэннэ. Буруйдуур түмүк Дьокуускайдааҕы тырааныспарга  борокуруорунан бигэргэтилиннэ уонна суукка ыытылынна. Бириигэбэр тахсыар диэри дьыалаҕа эриллэр икки киһи иккиэн ханна да барбат туһунан докумуоҥҥа илии баттаатылар.