“Алдан” киинэ быракаатыттан киирбит үп сорҕото байыаннай дьайыы кыттыылаахтарыгар ыытыллыаҕа

Байыаннай дьайыы туһунан “Алдан”  диэн толору кээмэйдээх бастакы  уус-уран киинэни Москваҕа анал көрдөрүүгэ билиһиннэрбиттэрин туһунан Ил Дархан Айсен Николаев иһитиннэрдэ.

«Алдан»  киинэ – Саха сирин уонна Запорожье уобалаһын эрэгийиэннэр икки ардыларынааҕы холбоһуктаах бырайыага.  Дьиҥнээх буолбут түгэннэргэ олоҕуран уһуллубут киинэ ыам ыйын 1 күнүттэн киэҥ экраҥҥа тахсыаҕа. Киинэ сүрүн  дьоруойун  прототиба – “Хорсун быһыы” уордьан кавалера, байыаннай быраас, Саха сирин ИТ-урбаанньыта Николай Потапов.

«Кини устуоруйта  — хорсун быһыы уонна дойдуга бэриниилээх буолуу, таптал холобура. Мин биир идэлээҕим, Запорожье уобалаһын губернатора Евгений Витальевич Балицкай киинэ күн аайы биһиги дойдубутун – Арассыыйаны көмүскүүр уолаттарбыт хорсун быһыыларын туһунан буоларын бэлиэтээтэ.  «Алдан» курдук киинэлэр биһиги элбэх омуктаах норуоппут күүһүн көрдөрөргө көмөлөһөллөр.  Режиссер Дмитрий Кольцовка, сценаристарга, артыыстарга, хамаандаҕа барыларыгар үлэлэрин иһин махтанабын!” – диэн Айсен Николаев бэйэтин телеграм-ханаалыгар суруйда.

Өрөспүүбүлүкэ салайааччыта бэлиэтээбитинэн, киинэ быракаатыттан киирбит үп сорҕото байыаннай дьайыы кыттыылаахтарын өйүүргэ уонна патриоттуу тыыҥҥа иитэр киинэ бырайыактарын сайыннарыыга бэриллиэҕэ. “Алдан” мөлүйүөнүнэн киһи сүрэҕин таарыйыаҕар эрэнэбин. Бу – биһиэхэ өйдөбүнньүк. Биһиги күүспүт”, — диэн Айсен Николаев эбэн эттэ.

Киинэ режиссера Дмитрий Кольцов бу иннинэ “Рядовой Чээрин”   диэн Аҕа дойду Улуу сэриитин туһунан уус-уран киинэни устубута. Киинэни устарга Запорожье уобалаһыгар баар анал подразделение кыттыыны ылла. Артыыстар састааптарыгар Иван Охлобыстин, Дмитрий Дюжев, Илья Яковлев уо.д.а. бааллар. Бырайыак ХR технологияны туһанан уһуллубут саха бастакы киинэтинэн буолла.