«Алдан» киинэ хомуура номнуо 1,42 мөл. солк. куоһарбыт

Киинэ пуондатын чахчыларынан, «Алдан» киинэ ыам ыйын 1 күнүттэн прокатын 1,42 мөл. солк. тахса суумалаах саҕалаата.

Бу көрдөрүү дойду үрдүнэн ТОП-10 испииһэккэ (1,39 мөл. солк.) киирэргэ кыах биэрдэ. Итинэн сибээстээн, салгыы уһун өрөбүллэргэ өссө эбиллэрэ күүтүллэр.

«Алдан» киинэ сюжета ИТ-урбаанньыт олоҕун туһунан кэпсиир. Персонаж дьиҥнээх прототиптаах. Киинэ хамаандата Николай Потапов олоҕун историятынан сөҕөн-махтайан байыаннай дьайыыга анаммыт драманы уһулбуттар. Билигин байыас бааһыран баран, төрөөбүт дойдутугар төннөн, таптыыр дьыалатынан салгыы дьарыктанар.

Санатан эттэххэ, прокаттан киирбит үп-харчы байыаннай дьайыыга көмөҕө уонна патриотическай киинэни сайыннарыыга туһуланыахтаах.