«Алдан» киинэҕэ байыаннай дьайыыга кыттыбыт урбаанньыт туһунан көстүөҕэ

Өрөспүүбүлүкэ күнүгэр, муус устар 27 күнүгэр, Ил Дархан Айсен Николаев быһа эпиирин кэмигэр ыам ыйын 1 күнүттэн киэҥ прокакка тахсыахтаах «Алдан» киинэ туһунан иһитиннэрдэ.

«Алдан»  киинэ – Саха сирин уонна Запорожье уобалаһын эрэгийиэннэр икки ардыларынааҕы холбоһуктаах бырайыага.  Дьиҥнээх буолбут түгэннэргэ олоҕуран уһуллубут киинэ ыам ыйын 1 күнүттэн киэҥ экраҥҥа тахсыаҕа. Киинэ сүрүн  дьоруойун  прототиба – “Хорсун быһыы” уордьан кавалера, байыаннай быраас, Саха сирин ИТ-урбаанньыта Николай Потапов.

Киинэ режиссера Дмитрий Кольцов бу иннинэ “Рядовой Чээрин”   диэн Аҕа дойду Улуу сэриитин туһунан уус-уран киинэни устубута. Киинэни устарга Запорожье уобалаһыгар баар анал подразделение кыттыыны ылла. Артыыстар састааптарыгар Иван Охлобыстин, Дмитрий Дюжев, Илья Яковлев уо.д.а. бааллар. Бырайыак ХR технологияны туһанан уһуллубут саха бастакы киинэтинэн буолла.