Алдан Кутанатыгар турбут баһаары умуруорууга күүһү элбэтиэхтэрэ

Алдан улууһун Кутана сэлиэнньэтиттэн 3 км сиргэ   турбут  40 тыһ. гектардаах ойуур баһаарын умуруорууга бары күүһү уураллар.  

Билигин манна  42 киһи үлэлиир. Минерализованнай балаһалар оҥоһуллаллар, утары уот ыыталлар.

«Олохтоох 29 киһини кытта,   «Якутлесресурс» ГАУ 9, Баһаары утары судаарыстыбаннай сулууспа 3, лесничество 1 үлэһитэ бааллар. Баһаары умуруорууну уопуттаах ойуур харыстабылын үлэһитэ салайар», – диэтэ бастакы  вице-премьер Дмитрий Садовников.

Үс күнү быһа манна Бе-200 амфибия-сөмөлүөт үлэлээбитэ. Садовников эппитинэн, көтөр аал сарсын салгыы үлэлиэҕэ. Кутанаҕа 10 быыһааччылаах эбии аэромобильнай бөлөх барыаҕа.

Алдан оройуонугар маны таһынан Угоянтан 20 км сиргэ турбут баһаары умуруорууга 39 киһи, ол иһигэр  «Авиалесоохрана»   30  үлэһитэ үлэлиир.