Алдан оройуонугар СӨ Бырабыыталыстыбатын отчуота саҕаланна

Алдан оройуонугар СӨ Бырабыыталыстыбатын отчуота саҕаланна. Көрсүһүү Томмоттон уонна Ыллымахтан саҕаланна. Бырабыыталыстыба отчуотугар 88 киһи сырытта.

СӨ Бырабыыталыстыбатын бэрэссэдээтэлин бастакы солбуйааччы Кирилл Бычков салалтатынан бырабыыталыстыба чилиэннэрэ үс күн устата нэһилиэнньэлээх пууннарга сылдьан ааспыт сыллааҕы үлэни-хамнаһы сырдатыахтара. Бөлөххө СӨ Доруобуйа харыстабылын, тутуу, бырамыысыланнас уонна геология миниистирдэрэ уо.д.а. бааллар.

Санатан эттэххэ,  тыа сирин дьонун-сэргэтин кытта маннык кытта атах тэпсэн олорон кэпсэтии, пандемия кэнниттэн, бастаан сөргүтүллэн ыытыллар.

Томмокко нэһилиэнньэни кытары көрсүһүү иннинэ дьону-сэргэни кытары биирдиилээн кэпсэтии, ыйытыыларыгар хоруйдары биэрии тэрилиннэ. Олохтоохтор миниистирдэргэ ыйытыылары биэрдилэр: инбэлииккэ тахсарга докумуону оҥотторуу, мэдиссиинэ тэрилтэлэрин үлэлэрин тэрийии, ону сэргэ, олох-дьаһах боппуруостарыгар тохтоотулар.

«Слюдяник» Култуура киинигэр көрсүһүүгэ, Кирилл Бычков Саха сиригэр 2022 сыллааҕы үлэ түмүктэрин кэпсээтэ. Саха сирин олохтоохторо түмсүүлээхтэрин, төрөөбүт дойдуга бэриниилээх буолуу тыына күүһүрбүтүн бэлиэтээтэ. Маны сэргэ, кини өрөспүүбүлүкэ экэниэмикэтигэр Алдан оройуона улахан кылаатын киллэрсэрин бэлиэтээтэ.

«Гражданнары хаарбах дьиэттэн көһөрүү» бырагыраама иитинэн 2022 сылга Алдан оройуонугар 22 дьиэ (757 кыбартыыра) киирбит. Томмокко 2023 сылга олунньу 15 күнүгэр өссө 3 дьиэ, Алдаҥҥа I кыбартаалга элбэх кыбартыыралаах 2 дьиэ киириэхтээхтэр. 2025 сылга диэри оройуоҥҥа уопсайа 181 233 кв. м., о.э 8 589 киһи олорор элбэх кыбартыыралаах 536 дьиэттэн дьону көһөрүөхтээхтэр. Бу улуустарга 2019-2024 сс. хаарбах туруктаах дьиэлэртэн көһөрүүгэ саамай улахан кээмэйдээҕинэн биллэр.

Отчуот кэмигэр мэдиссиинэ көмөтүн оҥорууга, анал идэлээх мэдиссиинэ үлэһиттэрэ тиийбэттэрин туһунан, о.д.а. ыйытыылар киирдилэр. Киирбит ыйытыылары, туруорсуулары доруобуйа харыстабылын миниистирэ хонтуруолга ылла. Маны сэргэ, Алдаҥҥа оройуоннааҕы киин балыыһаҕа кэллиэгэлэригэр практическай уонна методическай көмөнү оҥорорго кэҥэтиллибит мэдиссиинэ сүбэтэ ыытыллара былааннанна. Манна СӨ Доруобуйа харыстабылын миниистирэ уонна министиэристибэ исписэлиистэра кытталлар.

Томмокко чааһынай дьиэҕэ олорооччулартан ыйытыылар киирдилэр. Ол курдук, муус устар 1 күнүттэн чааһынай дьиэлээх дьоҥҥо септиктэриттэн ууну хачайдааһыҥҥа субсидия  тохтуура уонна өҥөҕө төлөбүр дьиэни бас билээччилэргэ толору сүктэриллэрэ долгутарын биллэрдилэр. Маныаха кэтэх дьиэлэргэ сүрүннээн кырдьаҕастар олороллоро, онон итинник сууманы төлүүр кинилэргэ уустуга бэлиэтэннэ.

Кирилл Бычков маныаха билиҥҥи туругунан,  ууну хачайдааһыҥҥа киин ситим бырайыагын оҥорууга  концессионнай көҕүлээһин бэриллибитин, септигинэн туһанар чааһынай дьиэлээх хаһаайыттар бу ситимҥэ холбонуохтаахтарын иһитиннэрдэ. Бу кыһалҕалаах боппуруос үс сыл иһинэн быһаарыллыахтааҕын эттэ. Бырабыыталыстыба бэрэссэдээтэлин бастакы солбуйааччыга киирбит кэлэктиип суруга аҕам саастаах дьон уонна чэпчэтиинэн туһанар категорияҕа киирсээччилэр көмүскэллээх буолалларын туһугар мэхэньиисимнэри оҥорорго көрүүгэ ылыллыаҕа диэн этилиннэ. Дьон-сэргэ олорор куораттарыгар көхтөөхтүк ыытыллар тутууга хонтуруолу тэрийии, уот-күөс арахсыытын туһунан, о.д.а. ыйыттылар.

Түмүккэ, Кирилл Бычков киирбит бары ыйытыыларга хоруйдар бэриллиэхтэрэ диэн эттэ.

СӨ Ил Дарханын уонна Бырабыыталыстыбатын пресс-сулууспата.