“Алдан тыраассатын курдук”

Күммүт уһаан эрэрэ билиннэ, улахан тымныылар хаптайдылар быһыылаах. Хата, мантан саас тыалыран сордуура буолуо.

Иллэҥ оҕонньор тугу гыныахпыный? Нэдиэлэҕэ биирдэ дьаарбайа таарыйа Чернышевскай уулуссаҕа турар кууһунан атыылыыр баазаны кэрийэн, күммүн-дьылбын барыыбын. Үрүсээкпэр симэммин ас-үөл аҕалабын. Син баччааҥҥа диэри туһа киһитэбин ээ диэн испэр үөрэбин.

Ол эрээри ааттыын да Биэтэс Билээхэп буоллаҕым.   “Бу дойдуну” бэркэ билэбин диэххэ сөп. Ханна чэпчэки арыы баарын, ханна үчүгэй хортуоппуй атыыланарын. Арай тугу сөбүлээбэппин ыраас мууска ууран биэрдэхпинэ хайдаҕый?

Бу баазаҕа биирдэ эбит богуоннаах дьон, былыргылыы ааттаатахпына, ГАИ-лар диэн олох көстүбэттэр. Массыына элбэҕин көрүөҥ этэ. Ким тыаттан, ким куораттан буоллаҕа. Омуннаатахха, таах, Алдан тыраассатын курдук. Көтүтүү бөҕө. Нэһиилэ туораан истэххинэ, атын массыына көтүтэн кэлэр. Алдьархай кутталлаах сир диэтэҕиҥ. Онон мин курдук кырдьаҕас оҕонньоттор, эмээхситтэр сэрэниэхтэрин наада. Тайаҕынан да далбаатаан абыраммаккын.

Маҕаһыыннар эрээттэрин кэрийэбин. Онно эмиэ киһи сөҕөр хартыыната. Син сылы эргиччи атыылаан, үп-харчы эргийэр дойдута диэтэххэ, сүрдээх балаһыанньа. Үйэтигэр уларыйан көрбөтөх линолеумнар тэлгэнэн сыталлар, сорох сиргэ иҥнэн, атыыһыкка бокулуоннуохха сөп. Сорох маҕаһыыҥҥа киирэн кэллэххэ, кутуйах сыта муннугар саба биэрэр. Сорох маҕаһыыҥҥа эйэҕэһэ-сайаҕаһа суох баҕайы атыылааччылар. Тутааҕа туллубут ааннар…

Оттон сыаналарын туһунан киһи этэ да барбат. Саҥа дьыл кэнниттэн саҥалыы олох саҕаланнаҕа – сыана тос курдук. Уонна биир суолтан кэлэйэбин. Хайыы үйэ түүнүгүрэн эрэр сыырдар эҥин сыталлар. Ааспыкка биир атыыһыты ыҥыран: “Көр, бу сыыргын”, – диэбиппэр, киһи эрэ буоллар долбууртан ылбыта. Хонтуруоллуур уорганнар олох сылдьыбат сирдэрэ быһыылаах дуу дии саныыбын сороҕор баҕас. Үчүгэй хамнастаах, ботуччу биэнсийэлээх киһи өҥөйбөт сирэ буолан, арааһа, улахан хонтуруол суох дуу диибин. Һэ-Һэ!