Алдан улууһугар сүппүт икки балыксыты көрдүү бөртөлүөт көттө

Бүгүн, алтынньы 23 күнүгэр, Алдан улууһугар алтынньы саҥатыгар сүппүт икки балыксыты көрдүү бөртөлүөт көттө.

Бу туһунан Саха сиринээҕи Быыһыыр сулууспатын пресс-сулууспата иһитиннэрдэ.

«Бүгүн сарсыарда 08:30 чааска Дьокуускайтан сүппүт дьону көрдөөһүҥҥэ түөрт быыһааччылаах «Полярные авиалинии» хампаанньа бөртөлүөтэ көттө. Алдаҥҥа сирдээччини уонна өссө биир быыһааччыны ылар былааннанар», — диэн иһитиннэриигэ этиллэр.

Санаттахха, икки эр дьон, 1956 уонна 1981 с.т.,балаҕан ыйын 25 күнүгэр Тимптон өрүскэ балыктыы тахсыбыттара. Кинилэри бүтэһигин алтынньы 8 күнүгэр Тас Хонку өрүс уһугар Алдантан 250 км сиргэ көрбүттэр. Алтынньы 18 күнүгэр сүппүт дьону чааһынай аэролодканан көрдүү сатаабыттара да булбатахтара.