Алдан улууһугар тыаҕа тэллэйдьит дьахтар сүппүт

Атырдьах ыйын 10 күнүгэр Алдан улууһугар 1951 с.т. дьахтар сүппүтүн туһунан иһитиннэрии киирдэ.

Кини кэргэнин уонна доҕорун кытта Ыллымах бөһүөлэгин таһыгар тэллэйдии тахсыбыттар. Болдьоспут кэмнэригэр эр дьон массыынаҕа төннөн кэлбиттэр, ол эрээри дьахтар кэлбэтэх. Бэйэлэрэ көрдөөн көрбүттэр да, булбатахтар. Киэһэ 18:00 чаас саҕана кинилэр бөһүөлэккэ төннөн кэлэн, дьахтар сүппүтүн туһунан биллэрбиттэр. 19:40 чааска кинини көрдүү БПЛА-лаах Алданнааҕы көрдүүр-быыһыыр этэрээт икки быыһааччыта, полиция үлэһиттэрэ уонна аймахтара барбыттар. Бу туһунан Саха сиринээҕи Быыһыыр сулууспа иһитиннэрэр.