Дьокуускайга дьахтар атын киһи кыбартыыратын уоттаан буруйданна

Дьокуускайга кыбартыыра хаһаайката уонна куортамнааччы дьахтар икки ардыларыгар дьыаланы суутунан көрүү түмүктэннэ.

Бу туһунан Саха сиринээҕи Үрдүкү суута иһитиннэрэр. Быһылаан 2023 сыл кулун тутар ыйыгар, эмсэҕэлээччи дьахтар Мордвинов аатынан уулуссаҕа баар дьиэтин куортамҥа биэрбититтэн саҕаламмыт.

Ол сыл сэтинньи 25 күнүгэр кыбартыыраҕа баһаар тахсыбыт. Куортамнааччылар розеткаҕа холбонон турар электрическэй сылытары көрүүтэ-харайыыта суох хаалларбыттар.

Баһаар түмүгэр кыбартыыра эрэ буолбакка, ыаллыы турар дьиэ эмиэ эмсэҕэлээбит. Хаһаайка суут быһаарыытынан ыалларыгар 73 тыһыынча солкуобайтан тахса харчыны төлүүргэ күһэллибит. Оттон куортамнааччылар, өрөмүөҥҥэ көмөлөһүөх буолан эрэннэрбиттэрин үрдүнэн, туох да хамсааһыны оҥорбокко, көһөн барбыттар.

Бастакы инстанциялаах суут эспэртииһэни анаабыт, онно хоромньуну 876 311 солкуобай 41 харчынан сыаналаабыттар. Итини таһынан, куортамнааччылартан хаһаайка ыалларыгар төлөөбүт харчытын ирдээбит. Буруйдаах дьахтар ити быһаарыыны мөккүһэ сатаабыт да, Саха сиринээҕи Үрдүкү суута ону уларыппакка хаалларбыт.

Билигин буруйдаах дьахтар кыбартыыра хаһаайкатыгар уопсайа 950 тыһыынча кэриҥэ солкуобайы төлүүргэ эбээһинэстэннэ. Суут быһаарыыта сокуоннай күүһүгэр номнуо киирбит буолан, куортамнааччылар төлөбүртэн куотар кыахтара суох.