Алдаҥҥа дронтан көмүскүүр суорҕаннары оҥорууну саҕалаатылар

Алдан куорат «Стимул» уопсастыбаннай көҕүлээһиннэр киинигэр үлэ оргуйар – олохтоох актыбыыстар байыаннай сулууспалаахтарга анаан анал дронтан көмүскүүр суорҕаннары тигэр сыаҕы тэрийдилэр.

Бу туһунан «Алданский рабочий» хаһыат иһитиннэрэр. «Ориентир» уоопсастыбаннай тэрилтэ көҕүлүүр бөлөҕө, ол иһигэр Екатерина Рудых, Инна Плачинта, Олеся Денисова уонна Яна Кофанова, оҥорон таһаарыыны олохтообуттар.

«Биһиги хас биирдии суорҕаммыт – бу инники кирбиигэ сылдьар уолаттарбытыгар эбии көмүскэл буолар. Оҥоһуктары араас күүстээх уонна ыраахха дьайар тепловизордарынан ымпыктаан-чымпыктаан тургутан көрдүбүт. Түмүктэр биһигини үөртүлэр – оҥоһук сылааһы көдьүүстээхтик кистиир», — диэн бырайыак кыттааччыларыттан биирдэстэрэ Инна Плачинта кэпсиир.

Бэлэм оҥоһуктар бастакы баартыйалара Алдаҥҥа баар «Хотугу ыҥырыы» гуманитарнай көмөнү хомуйар пуунтан быһаччы анал байыаннай дьайыыга ыытыллар сиригэр ыытыллыаҕа. Ураты махтал тылларын бырайыак кыттааччылара Яна Кофановаҕа аныыллар.

Педагог бэйэтин үбүнэн-харчытынан анал таҥаһы, синтепону уонна фольганы — туох баар наадалаах матырыйааллары барытын атыыласпыт. «Маннык хамсааһыннар биһигини барыбытын кынаттыыр. Хас биирдии киһи, идэтиттэн, баайыттан-дуолуттан тутулуга суох, уопсай дьыалаҕа бэйэтин кылаатын киллэриэн сөбүн чаҕылхай холобура», — диэн Екатерина Рудых бэлиэтээтэ.

Дронтан көмүскүүр суорҕаннары тигэр пуун көҕүлээһини өйүөн баҕалаах бары дьонтон көмөнү тутарга бэлэм. Сибээс төлөпүөнэ: +7-925-175-57-95.