Алдаҥҥа хайыһарынан сүүрүүгэ Бүтүн Арассыыйатааҕы күрэхтэһиилэр түмүктэннилэр

Алдаҥҥа «Селигдар Куубага» диэн хайыһарынан сүүрүүгэ Бүтүн Арассыыйатааҕы күрэхтэһиилэр буолан аастылар.

Алтынньы 31 күнэ түмүктүүр күн буолла, кыттааччылар классическай сприҥҥэ күрэхтэстилэр, диэн СӨ Успуорка министиэристибэтин пресс-сулууспата иһитиннэрэр. Сүрүн түгэнинэн Татарстантан сылдьар Горбуновтар дьиэ кэргэттэрин урут буолбатах ситиһиитэ буолла — Илья уонна Лидия бэйэлэрин категорияларыгар кыһыл көмүс мэтээллэри ылан, түмүктүүр күн дьону сөхтөрдүлэр.

Кэргэнниилэр эр дьон уонна дьахталлар түһүмэхтэригэр кыайан, үрдүк маастарыстыбаларын көрдөрдүлэр. Бу иннинэ, алтынньы 30 күнүгэр, күүстээхтэр сүүрүүлэрэ буолбута, онно Арассыыйатааҕы биатлоҥҥa сүүмэрдэммит хамаандатын чилиэттэрэ эмиэ кыттыбыттара. Дьахталларга бастыҥ алта киһи ахсааныгар киирдилэр: Евгения Крупицкая (Санкт-Петербург); Лидия Горбунова (Татарстан); Дарья Канева (Коми); Виктория Сливко (Тюмень); Елизавета Шалабода (Москва); Анастасия Гринько (Хабаровскай). Эр дьоҥҥо бастыҥ көрдөрүүлэри ситистилэр: Илья Семиков (Коми); Иван Горбунов (Татарстан); Евгений Сидоров (Красноярскай); Евгений Семяшкин (Коми); Александр Корнев (Удмуртия); Эдуард Латыпов (Башкортостан).

Күрэхтэһиини тэрийэр кэмитиэт партнердарыгар уонна спонсордарыгар – «Селигдар» ААУо-ҕа махталын тиэрдэр. Кинилэр өйөбүллэринэн күрэхтэһиини маннык үрдүк таһымҥа ыытыы кыаллынна. Ону таһынан, сэтинньи 3–4 күннэригэр Алдаҥҥа көмүһү хостуур GV GOLD хампаанньа өйөбүлүнэн биатлоҥҥа «Ультраспринт» күрэхтэһиилэрэ ыытыллыахтара. Сэтинньи 3 күнүгэр биирдиилээн күрэхтэһиилэр, оттон сэтинньи 4 күнүгэр – эстафеталар буолуохтара.

Саха Өрөспүүбүлүкэтин успуордун уонна физическэй култууратын миниистирэ Леонид Спиридонов эппитинэн, Алданнааҕы хайыһар баазата үрдүк таһымнаах күрэсчиттэри бэлэмнииргэ бэйэтин уһулуччулаах былаһаакка быһыытынан көрдөрдө.