Алдаҥҥа сир баайын хостуур хампаанньа даамбата алдьанна

Бу күннэргэ социальнай ситиминэн Алдан улууһугар өрүс киртийбитин туһунан устуу тарҕаммыта. Олохтоохтор тустаах тэрилтэлэр бэрэбиэркэ ыытаннар, дьаһал ылалларыгар көрдөспүттэрэ.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ Турукан өрүс киртийиитигэр «Резерв» ЗДК ХЭТ сыһыаннаан миэстэтигэр былаана суох бэрэбиэркэни ыытта. Ол түмүгүнэн киртийии тарҕаммыт төрүөтүнэн уу түһэр күөлүн даамбата алдьаммыта быһаарыллыбыт. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрэр.

Ол курдук, бэс ыйын 27 күнүн сарсыардатыгар «Резерв» ЗДК сир баайын хостуур учаастагар 4-с водохранилище осадочнай ыстаансыйатын даамбата алдьаммыт, ол түмүгэр икки аллараа турар даамбалар суураллыбыттар. Бэрэбиэркэ ыытыллар кэмигэр хампаанньа үлэһиттэрэ өрөмүөн-чөлүгэр түһэрэр үлэни ыыта сылдьаллар эбит.

Бу быһылаан тахсыытынан Айылҕа харыстабылын эйгэтигэр кэтээн көрөр Федеральнай сулууспа (Росприроднадзор) Саха сиринээҕи управлениетыгар, Балыктааһыҥҥа федеральнай ааҕыныстыбаҕа (ВСТУ), Потребительскэй бырааптары уонна киһи олоҕун-дьаһаҕын көмүскүүр эйгэҕэ кэтээн көрөр федеральнай сулууспа Саха сиринээҕи управлениетыгар, Өлүөнэ тардыытынааҕы уу тэрилтэтигэр уонна Дьокуускайдааҕы айылҕа харыстабылын борокуратууратыгар тустаах иһитиннэрии ыытыллыбыт.

Сир баайын туһанааччыга сыһыаннаах былаана суох бэрэбиэркэ салҕанан барар.