Алдаҥҥа спартакиада уота умайда

Алдаҥҥа успуорт кыһыҥҥы көрүҥнэригэр спартакиада аһыллыыта буолла. «Алдан» стадиоҥҥа 28 улуус, Алдан улууһун 50 успуорт династияларын хамаандалара парааттаан киирдилэр. Чаҕылхай күннээх, сааскылыы чэмэлкэй күн туран биэрдэ.

Кыттааччылар бастаан Красногорскайга буолбут теракка өлбүт дьону кэриэстээн, биир мүнүүтэ саҥата суох турдулар.

СӨ Бырабыыталыстыбатын бэрэссэдээтэлин солбуйааччы Сергей Местников Алданнааҕы хайыһар баазата дойду үрдүнэн спортсменнар мустан эрчиллэр кииннэригэр кубулуйда диэн эттэ. Арассыыйа биатлоҥҥа уонна хайыһарга хомуур хамаандалара сезон саҕаланыан иннинэ кэлэн эрчиллэллэрэ үгэскэ кубулуйда. Өрөспүүбүлүкэ хайыһар киинин салгыы сайыннарыаҕа диэн кини эрэннэрдэ.

Спартакиада бочуоттаах ыалдьыттарынан олимпиада икки төгүллээх чөмпүйүөнэ, биатлоҥҥа аан дойду үс төгүллээх чөмпүйүөнэ, РФ успуордун үтүөлээх маастара Ольга Зайцева уонна олимпийскай чөмпүйүөн, хайыһарынан сүүрүүгэ аан дойду үс төгүллээх чөмпүйүөнэ, успуорт үтүөлээх маастара Никита Крюков буоллулар.

Ольга Зайцева спартакиада тэриллиитэ үрдүк таһымнааҕын бэлиэтээтэ. Никита Крюков кыттааччыларга үрдүк ситиһиилэри, көрөөччүлэргэ астык күрэхтэһиилэри сэргииллэригэр баҕарда.

Спартакиада былааҕын Саха сирин кыһыҥҥы көрүҥнэргэ чулуу спортсменнара: Михаил Соснин, Регина Петрова, Роман Филиппов, Наталья Стуканева күөрэччи көтөҕөн аастылар.

Эбэҥки норуотун сиэринэн, уоту умаппыттарын кэннэ, өрөспүүбүлүкэ бастыҥ спортсменнара факелы илииттэн илиигэ бэрсэн баран, биатлонист Александру Процукаҕа биэрбиттэригэр, кини V Саха сирин кыһыҥҥы көрүҥнэргэ спартакиадатын уотун уматта.

Спартакиада кулун тутар 25-31 күннэригэр Алдан уонна Нерюнгри куораттарга буола турар. Саха сиригэр спартакиада 4 сылга биирдэ ыытыллар.