Алдаҥҥа суол саахалыгар эмсэҕэлээбиттэр туруктара ыарахан

Бүгүн, атырдьах ыйын 2 күнүгэр, Алдан оройуонугар киһи өлүүлээх суол саахала буолбута. Микро-оптуобус уонна таһаҕас тиэйэр массыына харсыспыттара. Тоҕус киһи госпитализацияланна диэн Доруобуйа харыстабылын министиэристибэтэ иһитиннэрэр. 

Тоҕус киһиттэн биэһэ ыарахан туруктаах реанимацияҕа сытар, биир киһи туруга быстар мөлтөх диэн биэдэмистибэ иһитиннэрэр.

Микро-оптуобуска 12 киһи олорсон испит, ол иһигэр суоппар уонна түөрт сааһын ситэ илик оҕо.

Алдан оройуоннааҕы балыыһатын сүрүн бырааһын солбуйааччы Павел Лукьяненко этэринэн, бу дьоҥҥо көмө бары өттүнэн оҥоһуллар, Дьокуускай мэдиссиинискэй тэрилтэлэрин кытта теле-мэдиссиинискэй консультациялар ыытыллаллар.