Алдаҥҥа вахтовик тэллэйдии сылдьан сүппүт

Бүгүн, от ыйын 14 күнүгэр, Алданнааҕы ЕДДС-ка эр киһи сүппүтүн туһунан иһитиннэрии киирбит. Бу туһунан СӨ Быыһыыр сулууспатын пресс-сулууспата иһитиннэрэр.

Эр киһи вахтовай бөһүөлэктэн 12 чаас саҕана тэллэйдии барбыт. Хата, суотабай төлөпүөннээх эбит, сибээс хабар сиригэр сылдьыбыт. Кинини кытта сибээстэһэн, 15:09 чааска булбуттар.

Тыаҕа, билбэт сиргитигэр сылдьа сатаамаҥ. Бэйэҕитин кытта суобатай төлөпүөннээх сылдьыҥ, чугас дьоҥҥутугар ханна бараргытын биллэриҥ диэн СӨ Быыһыыр сулууспата сэрэтэр.

Суһал сулууспа нүөмэрэ — 112, СӨ Быыһыыр сулууспатын дьуһуурунайын нүөмэрэ — 8 4112 45 90 19.