Алдаҥҥа үс киһи эчэйиилээх суол саахала тахсыбыт

Алдаҥҥа суол саахалыгар үс киһи эчэйбит. Бэс ыйын 12 күнүгэр бөлүүн 04:30 чааска Томмот куоракка дьон эчэйилээх суол саахала тахсыбытын туһунан иһитиннэрии киирбит.

Быһылаан буолбут миэстэтигэр тиийэн Алдан оройуонун Госавтоинспекциятын үлэһиттэрэ быһаарбыттарынан, быһа холоон сарсыарда 04:20 чааска Томмот куорат Якутский переулокка 1992 с.т. суоппар «Тойота Терсел» массыынанан суолтан туораабыт.

Быһылаан түмүгэр суоппар араас эчэйиилээх балыыһаҕа киирбит. Суһал көмө сулууспата эр киһи хаҥас хомурҕанын уҥуоҕун тоһуппутун, төбөтүн эчэппитин диагнозтаабыт. Эр киһини Томмот киин балыыһатын хирургическай отделениетыгар киллэрбиттэр. Ону тэҥэ икки пассажир, 2002 с.т. уонна 2005 с.т. эр дьон, араас эчэйиини ылбыттар.

Бэрэбиэркэ кэмигэр массыына суоппара тырааныспар салайар бырааба суоҕа биллибит. Массыына ГАИ учуотугар турбат. Суол саахалыгар солуон иһигэр үһүөн курдарын бааммакка олорбуттар. Быһылаан чахчытынан бэрэбиэркэ ыытыллар.