Александр Атласов: «Аһынан-үөлүнэн өйөбүл баар»

Өрөспүүбүлүкэ тыа хаһаайыстыбатын миниистирэ Александр Атласов Саха сириттэн байыаннай эпэрээссийэҕэ кытта сылдьар дьоммутугар тыа хаһаайыстыбатын араас тэрилтэлэриттэн көмө тэрээһиннээхтик, утумнаахтык ыытылла турарын   иһитиннэрдэ.

— Байыаннай эпэрээссийэҕэ кытта барбыт дьоммутугар кулун тутар 3 күнүнээҕи туругунан тыа хаһаайыстыбатын араас тэрилтэлэриттэн, үлэ биэрээччилэриттэн ас-үөл, атын да өттүнэн барыта 2 591 746 солкуобайдаах көмө оҥоһулунна. Ол иһигэр: тыа хаһаайыстыбатыгар үлэлии сылдьан ыҥырыллыбыт байыаннай сулууспалаахтарга 1 929 478 солкуобайдаах өйөбүл оҥоһулунна; көмөҕө үлэлиир уопсастыбаннай тэрилтэлэргэ – 503,4 тыһ. солкуобай бэрилиннэ; дойду госпиталларыгар эмтэнэ сытар байыастарбытыгар 158,8 тыһ. солкуобай суумалаах олохтоох аһынан-үөлүнэн көмө ыытылынна («Эрэл» ТХПК — Нам улууһа, СӨ ТХМ), ыыһаммыт Краковскай халбаһыыны (ТХПК «Түмэн» — Дьокуускай к.), Өлүөхүмэ сыырын («Кладовая Олекмы» ХЭТ – Өлүөхүмэ улууһа), отон сиробун (“Тирэй” СПОК — Сунтаар улууһа), эт фаршын, кэтилиэти («Маалыкай» ТХПК), ынах этин («Саха сүөһүтэ» СӨ СПК), ыыһаммыт аһы (СӨ ТХМ, Габышев М.В. ИП ГКФХ бородууксуйалара), Өлүөхүмэ бэлимиэнин (СӨ ТХМ, Габышев М.В. ИП ГКФХ бородууксуйалара), («Бөртө» хаһаайыстыбата – Хаҥалас улууһа) уо.д.а. ыытаннар, бөдөҥ тэрилтэлэрбит ас полуфабрикатын көмөлөһө олороллор.
Байыаннай эпэрээссийэҕэ кытта сылдьар буойуттары өйүүр сыалтан Тыа хаһаайыстыбатын министиэристибэтин кэлэктиибин иһинэн сүбэ быһыытынан, олохтоммут кээмэйинэн ый аайы харчы хомуйуллар. Билигин 106,5 тыһ. солкуобай хомулунна. СӨ Куттал суох буолуутун хааччыйыыга судаарыстыбаннай кэмитиэтин сүбэ мунньаҕын түмүгүнэн байыаннай эпэрээссийэҕэ сулууспалааччыларга ыытарга анаан 3 тыһыынча ахсааннаах олохтоох ас нобуордарын бэлэмнээн, уопсайа, 13 туонна ас-үөл Москва куоракка ыытылынна. Аллараа Бэстээххэ диэри бу таһаҕас министиэристибэ тырааныспарынан таһылынна.
Саха сирин бааһынай уонна фермер хаһаайыстыбаларын, тыа хаһаайыстыбатын кээпэрэтииптэрин Ассоциациятын Сэбиэтин чилиэннэрэ гуманитарнай көмө быһыытынан саллааттарбытыгар экипировка арааһын: балаклава, сылаас таҥас, тактическай бэрчээкки, үрүсээк, эмп-том уо.д.а. булан-талан, хомуйан киин куоракка Орджоникидзе 10-гар баар гуманитарнай көмөнү тутар пууҥҥа туттарбыттара.
Маны таһынан министиэристибэ аатыттан Аҕа дойдуну көмүскээччи күнүн көрсө олохтоох оҥорон таһаарааччылартан ас бородууктатынан бырааһынньыктааҕы бэлэх нобуордара бэлэмнэнэн, «Бары бииргэ» Бүтүн Арассыыйатааҕы аахсыйа волонтердарын нөҥүө буойуттарбытыгар тиксэриллибитэ.
Биһиги министиэристибэбит иһинэн үлэлиир кэккэ тэрилтэлэртэн, холобура, «Туймаада» агрохолдинг АУо, «Гормолзавод» ХЭТ, «Якутский хлебокомбинат» АУо, «Хатастааҕы сибиинньэ комплекса», Дьокуускайдааҕы көтөр фабриката, Мэҥэ Хаҥаластан Төҥүлүтээҕи «Хоту» кэпэрэтиип, «Саха сүөһүтэ» тэрилтэ уо.д.а. байыаннай сулууспалаахтарга уонна кинилэр дьиэ кэргэттэригэр көмөлөрө, өйөбүллэрэ улахан.