Александр Cусоев: «Бары кыайыы иһин күүспүтүн холбоон үлэлиибит»

Байыаннай эпэрээссийэ кыттыылаахтарыгар уонна кинилэр дьиэ кэргэттэригэр тиһиктээх көмө оҥоһуллар, өйөбүл дьаһаллар ылыллаллар. Улуустарга, куораттарга муниципальнай тэриллиилэр туспа былааннаах үлэни ыыталлар.

Судаарыстыбаннай уонна муниципальнай былаас уорганнара байыаннай эпэрээссийэ кыттыылаахтарыгар уонна кинилэр дьиэ кэргэттэригэр араас өрүттээх көмөнү оҥороллор диэн бэйэтин санаатын Кэбээйи улууһун баһылыгын солбуйааччы Александр Сусоев үллэстэр:

— Кэнники сылларга дойдубут улахан тургутууну ааһар:  бастаан хамсык, оттон анал байыаннай эпэрээссийэ, аны сааҥсыйа… Чэпчэкитэ суох кэм үүннэ. Ол эрээри билиҥҥи уустук кэмҥэ биһиги маннык түмсүүлээх, биир сомоҕо буоллахпытына, кыайыыны ситиһиэхпит диэн эрэллээхпин.

Кэбээйи улууһугар байыаннай эпэрээссийэ кыттыылаахтарыгар уонна кинилэр дьиэ кэргэттэригэр көмө тиһиктээхтик оҥоһуллар. Хас биирдии ыалга араас өрүттээх боппуруостары, кыһалҕаны быһаарарга куратордар сыһыарыллыбыттара. Ону таһына, сүбэ-ама буолар, хаһаайыстыбаҕа уонна атын даҕаны тэрээһиннэргэ көмөлөһөр волонтердар бааллар.

Волонтердар, тэрилтэлэр, анал үлэһиттэр – бары бу үлэҕэ кыттыһаллар. Хас биирдии киһи бэйэтин хайысхатынан көмөлөһөр. Ким эрэ гуманитарнай көмө хомуйуунан, ким эрэ ону тиэрдиинэн дьарыктанар, сорохтор байыаннай дьайыы кыттыылаахтарын дьиэ кэргэннэригэр хаһаайыстыбаҕа көмөлөһөллөр. Ким даҕаны туора туран хаалбат, бары кыайыы иһин күүспүтүн холбоон үлэлиибит.